Sálbma 85
1 Koarrajođiheaddjái. Korahlaččaid sálbma.
2 Hearrá, don leat leamaš
buorre iežat eatnamii.
Don jorgalit Jakoba oasi,
3 don addet ándagassii álbmogat
suddovealggi,
sihkkot buot sin rihkkumiid. Sela
4 Don hilljudit moarát,
jáddadit iežat buolli vaši.
5 Čuoččáldahte fas min, Ipmil,
min beasti,
ale leage šat vašis midjiide!
6 Bistágo du vašši agálaččat,
leatgo don midjiide moaris buolvvas bulvii?
7 Vare don jorgalivččet fas min beallái,
nu ahte du álbmot beassá illudit du siste!
8 Hearrá, čájet midjiide
ahte leat oskkáldas,
beastte min!
9 Mun guldalan maid Hearrá Ipmil sárdnu.
Son lohpida ráfi álbmogasas,
daidda geat leat sutnje oskkáldasat
– go sii fal eai máhcaše jallavuhtii!
10 Duođaid, su bestojupmi
lea lahka daid geat ballet sus,
su hearvásvuohta ássá fas min eatnamis.
11 Árbmu ja duohtavuohta gávnnadit,
vanhurskkisvuohta ja ráfi
cummistit nubbi nuppi.
12 Oskkáldasvuohta bohciida eatnamis,
vuoigatvuohta geahččá vuolás almmis.
13 Hearrá ieš addá buot buriid,
ja min eanan addá šattuidis.
14 Vuoigatvuohta manná Hearrá ovddas,
dat dahká geainnu su lávkkiide.