Sálbma 86
1 Davida rohkos.
Hearrá, gula mu rohkosa ja vástit munnje,
mun lean váivváš ja vártnuheapme.
2 Várjal mu heakka,
mun lean oskkáldas.
Beastte bálvaleaddját, Ipmil,
mun dorvvastan dutnje.
3 Hearrá, leage munnje árbmugas!
Geažos beaivvi mun čuorvvun dutnje.
4 Illudahte bálvaleaddját sielu!
Hearrá, mun bijan iežan doaivvu dutnje.
5 Hearrá, don leat buorre,
don attát ándagassii,
don leat árbmugas buohkaide
geat čurvot du.
6 Hearrá, gula mu rohkosa,
guldal go mun ánun veahki.
7 Mun čuorvvun du heahtebeaivvi,
ja don vástidat munnje.
8 Hearrá, ipmiliid gaskkas
ii leat du veardásaš,
ii mihkkege leat veardideames du dahkun.
9 Buot álbmogat maid leat sivdnidan,
bohtet ja gopmirdit du ovdii,
dat gudnejahttet du nama, Hearrá.
10 Dasgo don leat stuoris
ja dagat oavdudaguid,
aivvefal don leat Ipmil.
11 Hearrá, oahpat munnje geinnot,
vai mun máhtán vádjolit du duohtavuođas.
Atte munnje juogatkeahtes váimmu,
vai mun balan du namas.
12 Hearrá, mu Ipmil, mun giittán du
oppa váimmustan,
mun gudnejahtán du nama agálaččat.
13 Du árbmugasvuohta lea stuoris,
don bestet mu sielu
jábmiidáimmu čiekŋalasas.
14 Ipmil, čeavlás olbmot čuožžilit
vuosttildit mu,
veahkaválddálaččaid joavku
bivdá mu heakka.
Eai sii beroš dus.
15 Muhto don, Hearrá,
leat váibmoláđis ja árbmugas Ipmil,
don leat gierdavaš,
du buorrevuohta
ja oskkáldasvuohta lea stuoris.
16 Geahča mu beallái ja árpmit mu!
Atte munnje fámu, beastte mu!
Munhan lean du bálvaleaddji,
du bálvaleaddjinissona bárdni.
17 Atte munnje mearkka das
ahte don leat buorre.
Divtte daid geat vašuhit mu,
oaidnit ahte don, Hearrá,
veahkehat ja jeđđet mu.