Sálbma 99
1 Hearrá lea gonagas!
Álbmogat soiget,
su truvnnu guddet kerubat,
eanan doarggista.
2 Stuoris lea Hearrá, Siona Ipmil,
son lea aliduvvon buot álbmogiid badjel.
3 Álbmogat máidnot su stuorra
ja hirbmatlaš nama.
Son lea bassi.
4 Don, fámolaš gonagas,
ráhkistat vanhurskkisvuođa,
don vuođđudit vuoigatvuođa,
oahpahit Jakobii
dan mii lea riekta ja vuoigat.
5 Alidehket Hearrá, min Ipmila,
luoitádehket su juolgevuloža ovdii!
Son lea bassi.
6 Moses ja Aron leigga su báhpat,
Samuel lei daid searvvis geat čurvo su nama.
Sii čurvo Hearrá, ja son vástidii.
7 Balvabáccis son sártnui sidjiide,
ja sii dolle báhkkomiid ja lágaid
maid son attii sidjiide.
8 Hearrá, min Ipmil, don vástidit sidjiide,
don addet sidjiide ándagassii,
muhto mávssahit sidjiide sin daguid.
9 Alidehket Hearrá, min Ipmila,
gopmirdehket su bassi vári guvlui!
Hearrá, min Ipmil, lea bassi.