Salmane

Tredje boka

¹ Ein salme av Asaf.

Sanneleg, Gud er god mot Israel,

mot dei som er reine av hjartet.

² Men eg var nær ved å snubla,

foten heldt på å gli ut.

³ For eg var misunneleg på dei hovmodige,

eg såg at det gjekk dei urettferdige vel.

⁴ Dei er utan plager til sin død,

magen er god og mett.

⁵ Dei lid ikkje som andre menneske,

dei blir ikkje plaga som andre folk.

⁶ Difor er hovmod deira halskjede,

dei er kledde i ei drakt av vald.

⁷ Synda deira kjem av velstand,

hjartans tankar fløymer over.

⁸ Dei spottar, dei talar i vondskap,

ovanfrå trugar dei med vald.

⁹ Dei lyfter munnen mot himmelen,

og tunga fer omkring på jorda.

¹⁰ Difor vender folk seg til dei

og syg i seg deira ord.

¹¹ Dei seier: «Korleis skulle Gud vita om det?

Har Den høgste kjennskap til noko?»

¹² Slik er dei urettferdige,

støtt er dei trygge og aukar sin rikdom.

¹³ Fåfengt har eg halde hjartet reint

og vaska hendene i uskuld.

¹⁴ For eg vart plaga heile dagen,

tala til rette kvar morgon.

¹⁵ Hadde eg sagt: «Slik vil eg tala»,

då hadde eg svike dine born.

¹⁶ Så tenkte eg etter, ville skjøna dette.

Det var pinefullt å sjå,

¹⁷ heilt til eg gjekk inn i Guds heilagdom;

då skjøna eg kva framtid dei får.

¹⁸ Ja, du fører dei ut på glatte vegar,

du får dei til å falla og bli knuste.

¹⁹ Brått går dei til grunne,

det er slutt, dei endar i redsle.

²⁰ Dei er som ein draum når ein vaknar.

Du foraktar synet av dei

når du reiser deg, Herre.

²¹ Så lenge eg var beisk i hjartet

og det stakk i nyrene,

²² var eg dum og visste ingen ting,

som eit fe var eg mot deg.

²³ Men eg blir alltid verande hos deg,

du har gripe mi høgre hand.

²⁴ Du leier meg med ditt råd,

og sidan tek du imot meg i herlegdom.

²⁵ Kven har eg elles i himmelen?

Når eg er hos deg, har eg ikkje glede i noko på jorda.

²⁶ Om kropp og hjarte forgår,

er Gud for evig mitt hjartans berg og min del.

²⁷ Dei som held seg borte frå deg, går til grunne,

du gjer ende på alle som er utrue mot deg.

²⁸ Men for meg er det godt å vera nær Gud.

Eg har teke mi tilflukt til Herren Gud.

Eg vil fortelja om alle dine gjerningar.