Biblar på løpande band
Både kristne og ikkje-kristne kan gå inn i ein bokhandel i ei kyrkje i Kina og kjøpe ein bibel. Men kravet er at biblane skal vere utgjevne av organisasjonar som har løyve til både å trykke og distribuere biblar.
Både Det kristne rådet i Kina og Den nasjonale katolske kyrkja er organisasjonar som er lovleg registrerte og har dette løyvet. Biblane blir produserte ved Amity-trykkeriet og derifrå blir dei sende til kyrker og forsamlingar via 79 distribusjonssenter som er spreidde over heile Kina.
Kva gjer Amity-trykkeriet?
Amity Press i Nanjing blei etablert i 1987 som eit svar på eit spørsmål frå kyrkjeleiinga i Kina. Dei sameinte bibelselskapa (UBS) hjelpte til ved etableringa, og i 1988
blei Amity Printing Company Ltd (APC) danna.
Avtalen var basert på eit samarbeids- prosjekt mellom Amity Foundation (ei samfunnsnyttig stifting oppretta av kristne leiarar i Kina) og Dei sameinte bibelselskapa. Det primære målet var å trykke biblar. Alt det første året produserte APC rundt ein halv million eksemplar av Bibelen.
Trykkeriet flytta til eit nytt anlegg i mai 2008: ein 87 000 kvadratmeter stor fabrikk, med kapasitet til å trykke opptil 25 millionar innbundne bøker i året.
Frå starten i 1987 og fram til desember 2021 er det trykt over 227 millionar eksemplar av Bibelen ved Amity-trykkeriet i Nanjing.
Gi ei gåve til bibelarbeidet i KinaEtableringa av Amity Printing Company har bidratt til å sikre ei kontinuerleg forsyning av biblar til heile det kristne Kina. Støtte frå Dei sameinte bibelselskapa og gåver frå bibelvener i Noreg og heile verda, har halde prisen på biblar låg. Sidan 1980-tallet har det vore ein utruleg vokster i kyrkjene, og fram til i dag har trykkeriet møtt den store lengten millionar av kinesarar har etter Guds ord.
Frå starten i 1987 og fram til desember 2021 er det trykt over 227 millionar eksemplar av Bibelen. Bortimot 89 millionar av desse er distribuerte rundt om i Kina, og i dette talet ligg det òg biblar på ti ulike minoritetsspråk og ei utgåve i blindeskrift.
Dei resterande 138 millionar biblar er trykte på meir enn 190 språk, og eksporterte til utanlandske kundar i over 140 forskjellige land og territorium rundt om i verda, spesielt i dei afrikanske landa.
Kor mange biblar skal trykkast i 2022?
Basert på talet av biblar som blei trykte i 2021, har styresmaktene for 2022 godkjent 2,4 millionar bibeleksemplar (medrekna både protestantiske og katolske biblar).
Alle publikasjonar i Kina, både religiøse og sekulære, må kvart år sende inn ein søknad til styresmaktene om kor mange biblar, inkludert billige biblar, som kan trykkast og distribuerast same året. Dette gjeld alle: Det kristne rådet i Kina, Den kinesiske patriotiske katolske organisasjonen og Den kinesiske katolske biskop-konferansen.
Når løyvet til å trykke biblar er godkjend, vil kyrkjene leggje inn ei tinging hos Amity Press Company (APC). Det er Amity som trykker og bind inn biblane.
Kulturrevolusjonen og bibelunderet
Kulturrevolusjonen var ein omfattande politisk kampanje som starta i Kina i april 1966. Revolusjonen tok sikte på ei gjennomgripande endring av samfunnet.
Gamle tradisjonar, institusjonar og kultur skulle bort for å skape eit nytt, kommunistisk samfunn. Initiativtakar var leiaren av det kinesiske kommunistpartiet, Mao Zedong.
Offisielt blei kulturrevolusjonen avslutta i oktober 1976 då dei fremste leiarane, den såkalla «Firarbanden», blei arrestert.
I denne perioden var all religiøs aktivitet forbode. Biblar blei konfiskerte og brente. Berre eit tiår seinare blei det som i dag er det største bibeltrykkeriet i verda etablert i Nanjing.
Sidan slutten av kultur- revolusjonen har talet på kinesiske kristne vakse til meir enn 46 millionar (basert på offisielle anslag) og 100 millionar (basert på uoffisielle anslag).
Ved Amity-trykkeriet er det sidan 1987 trykt heile 230 millionar biblar.