Jupmelen deanerh jïh Jupmelen gåetie
1 Åerpenh, læjhkan idtjim maehtieh dijjese håalodh numhtie guktie almetjidie gïeh Voejkenem åådtjeme. Tjoerim dijjese håalodh guktie almetjidie gïeh åedtjeste leah, guktie Kristusen slïedtemaanide. 2 Mielhkiem dijjese vedtiejim jïh idtjim jeatjah beapmoe vedtieh mejtie idtjidh annje maehtieh byöpmedidh. Idie gænnah dam annje maehtieh gænnah 3 juktie dijjieh annje dijjen båeries åedtjesne. Jis annje sohtehtidie jïh rïjtedidie, idie lidh dellie annje dijjen båeries åedtjine jïh jielede guktie jeatjah almetjh? 4 Gosse mubpie jeahta: «Manne Pöövlen learohke» jïh mubpie «Manne Apollosen», idie lidh goh jeatjah almetjh? 5 Gie dïhte Apollos jïh gie dïhte Pöövle? Dah guaktah hov deanerh gïeh dijjem viehkiehtigan jaehkedh guktie Jupmele sæjhta. 6 Manne gerniem seejim jïh Apollos tjaetsiem böökti. Jupmele jis dam sjïdtedehti. 7 Dïhte gie gerniem seejie jallh dïhte gie tjaetsiem buakta, ij mij leah. Ajve Jupmele gie sjïdtedahta. 8 Dïhte guhte seejie jïh dïhte guhte tjaetsiem buakta, aktesne lægan. Jïh guktie barkeme, baalhkam åadtjoejægan. 9 Månnoeh Jupmelen deanerh, dijjieh Jupmelen sjïdtestahke jïh Jupmelen gåetie.
10 Jupmele åårmege, baaji mannem gierkieh bïejedh guktie vijsies gåetie-tseegkije gierkieh beaja. Mubpieh dej nille gåetiem tseegkieh. Fïereguhte tjuara eensilaakan barkedh. 11 Ij gie maehtieh jeatjah gierkieh bïejedh. Gierkieh mah bïejesovveme, dah leah Jeesus Kristuse. 12 Dej gierkiej nille maehtieh gulline, sïlpine jallh gïltehke gierkiejgujmie gåetiem tseegkedh, jallh moerine, kraesine jallh haelmine. 13 Dellie vååjnoe mejnie fïere almetje bigkeme. Åejvien biejjie dam dååjrehte juktie dålline båata, jïh dålle gïehtjede guktie fïere almetje barkeme. 14 Almetje gïen gåetie tjåådtje, baalhkam åådtje. 15 Almetje gïen gåetie buelele, ij naan baalhkam åadtjoeh. Jïjtje badth dållen tjïrrh åabpesåvva. 16 Idie guarkah, dijjieh Jupmelen teempele, jïh Jupmelen Voejkene dijjesne? 17 Jis gie akt Jupmelen teempelem murhkie, dellie Jupmele dam murhkehte. Juktie Jupmelen teempele aejlies, jïh dïhte teempele dijjieh.
18 Ij gie galkh jïjtjemse nollelidh! Jis såemies dijjeste ussjede satne daennie veartanisnie væjsehke, dellie tjuara voestegh goh jabje sjïdtedh guktie maahta eensi væjsehke sjïdtedh. 19 Juktie veartenen vijsiesvoete lea jabjohkevoete Jupmelen tjelmiej uvte. Juktie tjaalasovveme:
Vijsies almetjidie geerele gosse dah væjsastellieh,
20 jïh:
Åejvie daajra vijsies almetji åssjalommesh ij mij gænnah leah.21 Dannasinie ij gie galkh almetjistie skrïehpestidh. 22 Pöövle, Apollos jïh Kefas, abpe veartene, jielede jïh jaemede, daate biejjie jïh båetije biejjieh, gaajhke dijjen leah, 23 jïh dijjieh Kristusen lidie, jïh Kristuse Jupmelen lea.