1 Gïehtjede man stoere gieriesvoetem Aehtjie mijjese vuesiehtamme gosse Jupmelen maanine åadtjobe årrodh! Jupmelen maanah hov libie. Veartene ij mijjem damth juktie veartene ij Jupmelem damth. 2 Mov gieries voelph! Daelie libie Jupmelen maanah, jïh ij annje dååjrehtovveme guktie edtjebe sjïdtedh. Mohte daejrebe gosse Kristuse dååjrehte, dellie galkebe goh Kristuse sjïdtedh juktie dellie åadtjobe vuejnedh guktie Kristuse lea. 3 Fïereguhte gie naemhtie håhkesje, jïjtjemse reejnie guktie Kristuse reejne lea.
Åerpienidie iehtsedh
16 Jeesuse vuesiehtamme mij gieriesvoete lea gosse jïjtse hïegkem mijjen gaavhtan vedtieji. Mijjieh aaj galkebe jïjtjemh hïegkide åerpeni gaavhtan vedtedh.
17 Guktie dïhte gie åtna gaajhkem maam jielemasse daarpesje jïh læjhkan jïjtse vaajmoem dahpa gosse vuajna vïellebe nyölke, guktie dellie Jupmelen gieriesvoetem maahta utnedh?
18 Mov maanah, iehtsede sinsitniem dahkoejgujmie jïh saetniesvoetine, jïh aellede gåaroes baakoejgujmie iehtsieh! 19 Dellie edtjebe daejredh mijjieh saetniesvoeten maanah jïh baajebe jïjtjemh vaajmojde Jupmelen uvte jaskedh. 20 Juktie Jupmele stuerebe mijjen vaajmoste jïh gaajhkem daajra jis mijjen vaajmoeh mijjem dööpmieh. 21 Mov gieries voelph, jis mijjen vaajmoeh eah mijjem dööpmh, dellie maehtebe Jupmelen uvte fraakas årrodh. 22 Dam maam birrebe, dam Jupmielistie åadtjobe. Jïh mijjieh altese båvrojde luvrebe jïh darjobe dam mij Jupmelen tjelmiej uvte hijven. 23 Jïh naemhtie altese båvroe: Mijjieh galkebe altese Baerniem, Jeesus Kristusen nommem, jaehkedh jïh sinsitniem iehtsedh guktie mijjem stilli. 24 Dïhte gie Jupmelen båvrojde luvrie, Jupmielisnie lea jïh Jupmele altasisnie. Daejrebe Jupmele mijjesne juktie jïjtse Voejkenem mijjese vadteme.