Orre sjïehtedimmie
4 Jupmielasse tjarkadibie Kristusinie. 5 Ibie hov maehtieh maam joem jïjtje jïermestalledh. Jupmele dïhte, mijjese maahtoem vadta. 6 Jupmele mijjem raaji orre sjïehtedimmiem dïenesjidh mij Voejkene lea, mohte mij ij baakoeh leah. Juktie baakoeh tjååskelieh, mohte Voejkene jealajahta. 7 Jaemeden dïenesjimmie aaj man baakoeh gierkide tjaalasovveme, hearlohkevoetine tjoevki guktie jisraelehkh idtjin hievieh Mosen ååredæjjese vuartasjidh. Dan tjïelke tjoevki jalhts jamhkaji. 8 Man hearlohkåbpoe Voejkenen dïenesjimmie tjuavka? 9 Gosse dïenesjimmie mij dåapmoem böökti, hearlohkevoetine tjoevki, dellie dïenesjimmie mij rïektesvoetem buakta, galka sagke stuerebe hearlohkevoetine tjoevkedh. 10 Dïhte mij evtebe dan tjïelke tjoevki, daelie hearlohkevoetem beasteme. Juktie daelie mubpie hearlohkevoete sagke tjïelkebe tjuavka. 11 Gosse dïhte mij dåssjani, dan tjïelke tjoevki, man stuerebe hearlohkevoetine edtja dïhte tjoevkedh mij ihkuve aajkan lea?
12 Gosse mijjen daagkeres håhkoe, dellie fraakas libie. 13 Ibie darjoeh goh Mose gie lijniem ååredæjjan uvte bïeji guktie jisraelehkh idtjin galkh vuejnedh guktie hearlohkevoete tjåålledi jïh jamhkaji. 14 Læjhkan dej mïelh goerpenamme juktie daan beajjan ååredæjja-lijniem utnieh gosse mij båeries sjïehtedimmeste lohkesåvva, jïh lijnie ij gåhkanamme juktie dïhte galka Kristusinie gåhkanidh. 15 Daan biejjien aaj lijnie dej vaajmoej uvte fïerhten aejkien gosse mij Mosen laakeste lohkesåvva. 16 Gosse Åajvan jarkelieh, lijnie vaaltasåvva. 17 Åejvie, lea Voejkene, jïh gusnie Voejkene lea, desnie ij gie gænnah svaatjkoen nuelesne. 18 Mijjieh gïeh Åejvien hearlohkevoetem lijnien namhtah vuartasjibie, mijjieh dehtie hearlohkevoeteste jeatjahtovvebe mij Åejvien Voejkenistie lea.