Hearlohkevoete vaejvesne vååjnoe
1 Ibie jammerh juktie Jupmele dïenesjimmiem jïjtsene aarmojne vadteme. 2 Gaajhkijste mejstie skaamasjibie, laehpebe. Ibie sluekieslaakan prægkosth, jïh ibie Jupmelen baakojde feelskh. Saetniesvoetem låaptjode bïejebe, jïh baajebe fïereguhtem Jupmelen uvte mijjem gïehtjedidh. 3 Jis mijjen bueriesaernie tjeakoes, dellie tjeakoes dejtie gïeh jamhkoeh. 4 Juktie daan veartenen jupmele dej jiermide jamhkeme guktie eah tjoevkem bueriesaerneste Kristusen hearlohkevoeten bïjre gænnah vuejnieh – Kristuse gie Jupmelen guelmine lea. 5 Ibie jïjtjemem håaloeh, mohte håalobe Jeesus Kristuse lea Åejvie jïh mijjieh dijjen dïenesjæjjah Jeesusen gaavhtan. 6 Juktie Jupmele jeehti: «Tjoevke galka jemhkielisnie tjoevkedh». Baaja tjoevkem mijjen vaajmosne tjoevkedh guktie saernie Jupmelen hearlohkevoeten bïjre galka tjoevkedh. Hearlohkevoete Kristusen ååredæjjeste tjuavka.
7 Vaarenesem laejrielihtesne utnebe guktie stoere faamoe Jupmelen luvhtie båata jïh ij mijjen luvhtie. 8 Iktesth dïedtelgibie, mohte ibie laarhkenh. Njåajjaribie, mohte ibie baanhtsan leah. 9 Dåålvesovvebe, mohte ibie laahpasovvh. Leerhkehtallebe, mohte ibie smualkah. 10 Iktesth Jeesusen vaejvie-jaemedem guedtebe guktie Jeesusen jielede aaj mijjine vååjnoe. 11 Juktie mijjieh gosse annje jielieminie, iktesth laahpasovvebe jaemedh Jeesusen gaavhtan guktie Jeesusen jielede vååjnoe mijjen jaame krehpine. 12 Dellie jaemede mijjen sisnie barka, mohte jielede dijjen sisnie. 13 Mijjen lea seamma jaahkoen Voejkene man bïjre tjaalasovveme: Manne jaahkam jïh dellie saernedem. Mijjieh aaj jaehkebe guktie saerniedibie. 14 Daejrebe hov Jupmele, gie Åejvie Jeesusem jaemiedistie lutnjesti, mijjem aaj Jeesusinie lutnjeste jïh åvtese vaedtsehte dijjine aktesne.
15 Naemhtie sjædta dijjen gaavhtan guktie aarmoe stoere sjædta jïh sagke jienebh gijhtieh jïh Jupmelem earoehtieh.
Jaahkoe jïh håhkoe
16 Ibie dellie jammerh gosse mijjen krehpie smualkoe juktie mijjen hïegke orreståvva biejjeste beajjan. 17 Mov daaletje vaejvieh gyöhpehke jïh dah mijjese ihkuve stoere hearlohkevoetem buektieh. Jïh dïhte hov sagke buerebe. 18 Ibie vuartesjh dam mij vååjnoe. Juktie dïhte mij vååjnoe, jamhkoe. Dïhte mij ij vååjnh, ihkuve aajkan lea.