Pïehtere starnedahta jïh hååle
12 Gosse Pïehtere dam vööjni, dellie eelki åålmegasse håalodh:
«Jisraelehkh, man gielhtie bååhperidie? Man gielhtie monnese vuartasjidie nåvh goh månnoeh jïjtjene faamojne jallh jaahkojne daam ålmam starnedahteme? 13 Ijje! Abrahamen, Aajsan jïh Jaahken Jupmele, mijjen maadtoej Jupmele, jïjtse deanerem, Jeesusem, aejliestamme. Dijjieh Jeesusem Pilatusen gåajkoe voelkehtidh jïh Jeesusem bïehtedidh gosse Pilatus sïjhti altemse luejhtedh. 14 Dijjieh Aejlieskodtjem jïh rïektesvoeten almetjem hiejhtiejidh jïh buvvijem sïjhtidh luejhtedh. 15 Jieleden sjugniedæjjam buvviejidh. Mohte Jupmele altemse jaemiedistie lutnjesti. Dam vihtenjostebe. 16 Jaahkoe Jeesusen nommese faamoem vadteme daan ålmese gïem vuejnede jïh gie dijjese åehpie lea. Jaahkoe mij mijjese Jeesusen nommine båata, ålmam starnedehti. Dam daelie vuejnede.
17 Vïellh, daelie daajram gujht dijjieh idtjidh guarkah maam darjoejidh, dijjieh jïh dijjen åvtehkh. 18 Jupmele illi dam maam profeetide stilleme saarnodh: Messija galka vaejviedidh. 19 Saangerdidie dellie jïh jarkelidie guktie dijjen sådtoeh luajhtasuvvieh. 20 Dellie læjnoedimmie Åejvien luvhtie båata jïh Åejvie galka Messijam, Jeesusem, mijjen gåajkoe raajedh guktie Åejvie mieriedamme. 21 Elmierïjhkesne galka årrodh goske sjædta guktie Jupmele dej beeli aejlies profeetide stilli soptsestidh.»