Mose reakede
1 Gaarmanæjja Levin boelveste nyjsenæjjine Levin boelveste pruvri. 2 Nyjsenæjja nåajsan sjïdti jïh baerniem baersieldi. Gosse vööjni tjaebpies baernie lij, dam golme askh tjïevni. 3 Gosse idtji maehtieh dam vielie tjïevnedh, papyrus-båmmoem darjoeji. Dam dervine dirvi. Dellie baerniem dïsse bïeji jïh dam Nilenen gaedtien papyrus-kraesiej giske bïeji. 4 Åabpebe dubpiebasse tjöödtjesti vuartasji guktie baernine sjïdti.
5 Dellie faraoven daktere johkebealese båata laavkodh. Altese noere sjovnh johkebieliem dohkh diekie vaadtsehtjieh. Dellie båmmoem kraesiej gaskesne vuajnije jïh sjovnem stillie dam veedtjedh. 6 Båmmoem rïhpeste jïh baerniem vuajnije desnie tjearoeminie. Maanam aarmode jïh jeahta: «Daate hebreladtjen baernie.»
7 Dellie baernien åabpa faraoven daktarasse jeahta: «Edtjem vaarredh hebreladtje nyjsenæjjam veedtjedh gie maahta baerniem njammehtidh?» 8 «Jaavoe, vaarrh amma!» faraoven daktere jeahta. Dellie noere nyjsenæjja vaarra tjidtjebem veedtjedh. 9 Faraoven daktere dïsse jeahta: «Dagke maahtah mov sijjesne baerniem sujhtedh jïh njammehtidh? Baalhkam edtjh åadtjodh.» Nyjsenæjja baerniem dåastoehti jïh njammehti. 10 Gosse baernie båarasåbpoe sjïdti, dellie faraoven daktarasse baerniem böökti, jïh baernie altese maanine sjïdti. Mosine gåhtjoeji «juktie tjaetseste sigkeme», jeehti.
Mose Midianese ræpma
11 Gosse Mose geerve sjïdteme, dellie altese almetji gåajkoe mïnni jïh vööjni guktie dah tjabreminie. Dellie vuajnije egypteladtje hebreladtjem njuvtele. 12 Mose bïjrejarkan vuartesje jïh gosse ij gïem vuejnieh, dellie egypteladtjem leerhkede jïh dam saadtan boernedahta.
13 Mubpien biejjien aaj olkese vualka. Dellie göökte hebreladtjide vuajna sinsitnine gæmhpoeminie. Dïsse gïen skåltoe lea, jeahta: «Man gielhtie dov lïhkesadtjem leerhkh?» 14 Ålma vaestede: «Gie datnem stilleme mijjen åvtehkinie jïh duapmarinie årrodh? Ussjedh mannem aaj buvvedh guktie egypteladtjem buvviejih?» Dellie Mose bïllije jïh ussjede: «Gaajhkesh badth daejrieh!»
15 Gosse faraove dan bïjre govli, voejhkeli Mosem buvvedh. Mose dellie faraoven luvhtie baatari Midianen laantese jïh prutnien lïhke årroeji.
16 Midianen hearran lin tjïjhtje nïejth dakterh.
21 Mose mietieji ålman luvnie årrodh, jïh dïhte jïjtse nïejtem, Sipporam, Mosese vedtieji dejnie pruvredh. 22 Sippora baerniem baersieldi, jïh Mose dam Gersjomine gåhtjoeji, «juktie ammes dajvese leam jåhteme», jeehti.
Jupmelen nomme jïh gohtjeme
23 Guhkiem dan mænngan Egypten gånka sealadi. Jisraelehkh sjuahkadallin jïh hojjedin juktie dej lij löövles barkoe. Dej ojkesimmieh Jupmelen gåajkoe jaksin. 24 Jupmele govli guktie dah maagreminie, jïh Jupmele jïjtse sjïehtedimmiem Abrahamine, Aajsine jïh Jaahkine måjhtaji. 25 Jupmele jisraelehkide vuartasji. Jupmele dejtie damti.