Mosen mubpie gærja

Jupmele Mosese volvere

¹ Mose voehpebe Jetroen sïrvide ryöjnesji. Jetro Midianen hearra. Dellie sïrvide saadtestahken mubpien raadtan sietieji Jupmelen vaaran, Horebese. ² Desnie Åejvien eengkelem vööjni skomtjelisnie mij tåarne-stråmhposne navvi. Gïehtjh! Stråmhpoe idtji buelelh. ³ Mose dellie ussjedi: «Magkeres rovnegs vååjnese! Tjoerem dahkoe vaedtsedh vuartasjidh man gielhtie stråmhpoe ij buelelh.» ⁴ Gosse Åejvie vuajna Mose dahkoe mænna, dellie tåarne-stråmhposte tjåårve: «Mose! Mose!» Dïhte vaestede: «Nov, daesnie hov leam.» ⁵ Dellie Jupmele jeahta: «Aellieh lïhkebe båetieh! Sigkh gaamegidie juktie datne aejlies sijjesne tjåadtjoeminie.» ⁶ Jïh vihth soptseste: «Manne dov aehtjien Jupmele, Abrahamen Jupmele, Aajsan Jupmele jïh Jaahken Jupmele.» Dellie Mose ååredæjjam tjeavna. Ij doesth Jupmielasse vuartasjidh.

⁷  Åejvie jeahta: «Manne vuajneme guktie mov almetjh Egyptesne vaejviedieh. Dej aajverds-vuelide govleme. Daajram hov guktie vaejvedeminie. ⁸ Manne elmierïjhkeste båateme dejtie egypteladtji svaatjkojste gorredidh jïh dejtie Egypteste, åajvoeh jïh vijries laantese vaedtsiehtidh gusnie veljie mielhkeste jïh hååneskistie, dahkoe gusnie kanaaneladtjh, hitteladtjh, amoreladtjh, peritseladtjh, hivveladtjh jïh jebuseladtjh daelie årroeminie. ⁹ Daelie manne jisraelehki aajverds-vuelide govleme, jïh jïjtje vuajneme guktie egypteladtjh dejtie behtjiedieh jïh irhkieh. ¹⁰ Vaedtsieh dellie! Datnem faraoven gåajkoe raajem, jïh datne galkh mov almetjidie, jisraelehkide, Egypteste vaedtsiehtidh.» ¹¹ Mose dellie vaestede: «Guktie dagkeres goh manne maahta faraoven gåajkoe vaedtsedh jïh jisraelehkide Egypteste vaedtsiehtidh?» ¹² Jupmele vaestede: «Datnem dåeredem. Jïh daate væhta vuesehte manne dïhte datnem raajeme: gosse almetjidie Egypteste vaedtsiehtamme, dellie edtjede daennie vaeresne Jupmielasse rohkelidh.» ¹³ Dellie Mose Jupmielasse jeahta: «Jis dellie manne jisraelehki gåajkoe båatam jïh jeahtam dej maadtoej Jupmele mannem dej gåajkoe raajeme jïh dah gihtjieh guktie altese nomme, maam dellie vaestedem?» ¹⁴ Jupmele vaestede: «Manne leam manne. Soptsesth: dïhte gïen nomme Manne leam, datnem dej gåajkoe raajeme.» ¹⁵ Jïh Jupmele vihth soptseste: «Jiehtieh jisraelehkide, Åejvie, dej maadtoej Jupmele, Abrahamen Jupmele, Aajsan Jupmele jïh Jaahken Jupmele datnem dej gåajkoe raajeme. Daate mov nomme ihkuve aajkan. Naemhtie galkede mannem boelveste boelvide nommestehtedh.»