1 Nemhtie elmie jïh eatneme jïh gaajhkh jielijh sjugniedovvin. 2 Jupmele tjïjhtjeden biejjien barkojne illi. Jïh tjïjhtjeden biejjien dellie lïegkedi gaajhkede sjugniedimmeste. 3 Jïh Jupmele tjïjhtjedem biejjiem bueriesjugniedi jïh aejliestehti juktie dan biejjien sjugniedimmeste lïegkedi.
Almetje Edenen såafosne
4 Naemhtie hov saernie eatnemen jïh elmien sjugniedimmien bïjre gosse Åejvie Jupmele eatnemem jïh elmiem sjugniedi. 5 Dellie idtji naan vesjnjie desnie. Jïh idtji sjædtoe bahtsegamme juktie Åejvie Jupmele idtji leah baajeme abrodh, jïh idtji naan almetje laantine barkeminie. 6 Dellie tjaetsie gaaltijistie galki jïh eatnemem sleedtjehti. 7 Jïh Åejvie Jupmele almetjem multeste sjugniedi jïh hïegkem njuenien sïjse båssoeji guktie jielije sjïdti. 8 Dej beeli Åejvie Jupmele såafoem Edenisnie sjugniedi jïh almetjem maam sjugniedamme, dahkoe baaji juhtedh. 9 Jïh Åejvie Jupmele baaji joekehts moerh eatnamasse sjïdtedh, tjaebpies moerh njaelkies muerjiejgujmie. Såafoen jarngesne jieledemoere jïh aaj dïhte moere mij daajroem buerievoeten jïh nåakevoeten bïjre vadta.
10 Jeanoe Edenistie galka jïh såafoem sleedtjehte. Jïh mænngan njieljie jeanojne joekene. 11 Dan voestes nomme Pisjon jïh dïhte Havila-laantem galka gusnie gullie. 12 Laanten gullie dan tjaebpie. Desnie aaj roenge-njïdtjele man nomme bedellijumme jïh tjaebpies gierkie man nomme onykse. 13 Mubpien jeanoen nomme Gihon. Abpe Kusjem galka. 14 Gåalmeden nomme Hiddekil mij Assuren luvlelen galka. Dïhte njealjede jeanoe Evfrat.
15 Åejvie Jupmele almetjem Edenasse raaji såafosne barkedh jïh dam geehtedh. 16 Åejvie Jupmele almetjasse jeehti: «Åadtjoeh gaajhkijste såafoen muerjie-moerijste byöpmedidh. 17 Aellieh amma moereste byöpmedh mij daajroem buerievoeten jïh nåakevoeten bïjre vadta. Juktie dan biejjien gosse destie byöpmedh, dellie galkh jaemedh.»
18 Dellie Åejvie Jupmele jeehti: «Ij leah hijven gaarmanæjjese oktegh årrodh. Aktem dïsse viehkine vadtam.» 19 Jïh Åejvie Jupmele multeste eatnemen gaajhkide kluhteridie sjugniedi dovne gaajhkide ledtide mah elmien nuelesne. Dejtie gaarmanæjjan gåajkoe böökti vuejnedh guktie dejtie nommestehti. Jïh guktie gaajhkide jieliejidie nommestehti, nemhtie dej nommh. 20 Gaarmanæjja hov gaajhkide kluhteridie nommestehti, gaajhkide ledtide mah elmien nuelesne jïh gaajhkide vijride mah eatnamisnie. Gaarmanæjja jis idtji gïem jïjtsissie viehkine gaavnh.
21 Dellie Åejvie Jupmele gaarmanæjjam nahkestahta. Jïh gosse nahkestamme dellie mïelke-daektiem vaalta jïh åedtjine deavhta. 22 Jïh daekteste maam Åejvie Jupmele gaarmanæjjeste vaalteme, nyjsenæjjam sjugnede jïh gaarmanæjjese vadta. 23 Dellie gaarmanæjja jeahta:
«Dellie maa daektie mov daektijste,åedtjie mov åedtjeste.Dan nomme nyjsenæjjajuktie gaarmanæjjeste lea.»24 Dannasinie gaarmanæjja galka aehtjebem jïh tjidtjebem laehpedh jïh jïjtse nyjsenæjjan luvnie årrodh, jïh dah guaktah aktene lægan.
25 Gaarmanæjja jïh nyjsenæjja båadtsode ligan, jïh idtjigan skaamesjh.