Ræjhkoes jïh giefies almetjh
1 Mov åerpenh gïeh mijjen Åajvan Jeesus Kristusasse, hearlohkevoeten Åajvan jaehkede, aellede almetjidie joekedehtieh! 2 Jis göökte gaarmanæjjah dijjen åålmegasse tjaangijægan, mubpie tjaebpies vaarjoejgujmie gåårveldihkie jïh gullie-reagka soermesne jïh mubpie giefie jïh soevene vaarjoejgujmie, 3 dellie vueptiestidie gaarmanæjjam gïen tjaebpies vaarjoeh jïh jiehtede: «Duelie, tjihkedh», jïh giefies gaarmanæjjese jiehtede: «Tjåadtjoeh amma dusnie!» jallh: «Tjihkedh mov juelkiej uvte!» 4 Idie dellie almetjidie joekedehtieh? Idie leah dellie duapmarinie sjïdteme gïeh nåakelaakan ussjedieh? 5 Mov gieries åerpenh, goltelidie: Ij sån Jupmele eatnemen giefies almetjidie veeljeme jaahkosne ræjhkoes almetjinie årrodh jïh rïjhkem eerpedh maam dejtie dåajvoehtamme gïeh Jupmelem iehtsieh? 6 Mohte dijjieh giefies almetjem væssjoehtidie gosse ræjhkoes almetjh dijjem nuerhkieh jïh dijjem reaktan uvte voelkehtieh. 7 Jïh dah buerie nommem laevsieh mij dijjese åehpie!
8 Jis dijjieh Tjaalegen gunkies laakem goltelidie: Iehtsieh jïjtjedh lïhkesadtjem goh jïjtjemdh, dellie rïekteslaakan dåemiedidie. 9 Jis almetjidie joekedehtede, dellie sådtoedidie, jïh laake dijjem laejhtede juktie laakem lidie bïehtedamme. 10 Juktie almetje gie abpe laakem goltele jïh aktem stillemem beahta, gaajhkide stillemidie beahteme. 11 Juktie dïhte gie jeehti: Aellieh gaalletjevoetem biehtieh, dïhte aaj jeehti: Aellieh buvvieh! Jis datne ih gaalletjevoetem biehtieh, mohte båvvah, dellie datne laakem beahtah. 12 Dijjieh gïeh galkede frïjjevoeten laaken mietie dööpmesovvedh, galkede dan mietie soptsestidh jïh dåemiedidh. 13 Juktie dåapmoe aarmohth dejtie almetjidie sjædta gïeh eah åårmege orreme. Aarmoe dåapmoem hååjhte.
Jaahkoe jïh dahkoe
14 Åerpenh, mejtie almetjasse aevhkie gosse jeahta sov lea jaahkoe mohte dahkohth lea? Mejtie jaahkoe dellie maahta almetjem gorredidh? 15 Jis vïelle jallh åabpa vaarjohth lea, jïh beajjetje beapmoe fååtese, 16 jïh akte dijjeste jeahta: «Vaedtsede raeffesne jïh bïjvijidie jïh gallanidie», viehkiem dellie åådtjeme jis idie vadteme dam maam krehpie daarpesje? 17 Naemhtie aaj jaahkoe: jaames lea jis dan ij leah naan dahkoe.