Hïeje Kanesne
1 Gåalmeden biejjien hïeje Kanesne Galilejesne, jïh Jeesusen tjidtjie desnie. 2 Jeesuse jïh jïjtse learohkh aaj hïejese bööresovveme. 3 Vijne nåhki jïh Jeesusen tjidtjie altasasse jeahta: «Eah dej naan vijne.» 4 Jeesuse vaestede: «Nyjsenæjja, baajh mannem årrodh. Ij mov aejkie annje båateme.» 5 Tjidtjebe gaagkijidie jeahta: «Darjode dam maam stillie.» 6 Desnie govhte gierkie-lihtieh juvdeladtji bïsseme-vuekiej mietie. Fïere medtie tjuetie lijterh tjeekie. 7 Jeesuse jeahta: «Dievhtede lihtide tjaetsine», jïh dellie dejtie eevre dïeves dievhtiejin. 8 Dellie jeahta: «Gåajvode jïh guedtede hïejegåassoehtæjjese», jïh dah dam darjoeh. 9 Hïejegåassoehtæjja tjaetsiem maajsta, mij vijnine sjïdteme. Juktie ij daejrieh gustie vijnem veedtjeme – dam hov gaagkijh gïeh tjaetsiem gååjveme, daejrieh – 10 provrese-ålmam tjåårve jïh jeahta: «Gaajhkh jeatjebh njaelkies vijnem voestegh böörieh jïh gosse guessieh tjïervenieh, dellie laehkeds vijnem böörieh. Mohte datne njaelkies vijnem minngemes böörh.» 11 Numhtie Jeesuse jïjtse voestes væhtam vuesiehti; Kanesne Galilejesne dïhte. Abpe jïjtse hearlohkevoetem vuesiehti jïh gaajhkh learohkh altasasse jaehkiejin. 12 Dan mænngan Kafar-naumese tjidtjiebinie jïh vïellebigujmie jïh learohkigujmie vaedtsieji, jïh desnie gellie biejjieh sjïdtin.
23 Jeesuse påaskem Jerusalemesne lij. Dellie gellie Jeesusasse jaahkajin gosse vööjnin gaajhkem maam darjoeji. 24 Mohte Jeesuse idtji dejtie leajhtedh juktie gaajhkesidie damti 25 jïh idtji daarpesjh maam joem almetjen bïjre govledh. Jïjtje hov deejri guktie almetje lea.