Jeesuse jïh Nikodemos
1 Fariseladtji luvnie gaarmanæjja gïen nomme Nikodemos. Juvdeladtji raeresne lij. 2 Akten jïjjen Jeesusen gåajkoe bööti jeehti: «Rabbi, daejrebe datne Jupmelen luvhtie ööhpehtæjjine båateme. Ij gie maehtieh Jupmelen namhtah åavtoeh darjodh goh datne.» 3 Jeesuse vaestede: «Saatnan, dutnjien jeahtam: dïhte gie ij orresistie reakedh, ij maehtieh Jupmelen rïjhkem vuejnedh.» 4 Nikodemos vaestede: «Guktie almetje maahta reakadidh gosse geerve? Ij sån maehtieh jiemien sïjse båetedh jïh ikth vielie reakadidh?» 5 Jeesuse vaestede: «Saatnan dutnjien jeahtam: dïhte gie ij tjaetseste jïh ij Voejkenistie reakedh, ij maehtieh Jupmelen rïjhkese tjaangedh. 6 Dïhte gie åedtjeste reakadamme, åedtjine lea, jïh dïhte gie voejkenistie reakadamme, voejkeninie lea. 7 Aellieh bååhperh gosse jeahtam tjoerede orresth reakadidh! 8 Bïegke slomtje jïh datne bïegkem govlh, læjhkan ih daejrieh gubpede jallh gåabpoeh beagka. Nemhtie dejgujmie gïeh voejkenistie reakadamme.» 9 Nikodemos gihtjie: «Guktie nemhtie jis?» 10 Jeesuse vaestede: «Datne jis ööhpehtæjjine jisraelehkide jïh ih dam guarkah! 11 Saatnan, dutnjien jeahtam: dam maam daejrebe, daam saarnobe, jïh dam maam vuajneme, dan bïjre vïhnesjibie, læjhkan idie mijjen vïhnesjimmiem dåastohth. 12 Jis idie jaehkieh gosse dijjese soptsestem dan bïjre mij eatnamisnie, guktie dellie edtjede mannem jaehkedh gosse soptsestem dan bïjre mij elmierïjhkesne?
13 Ij gie elmierïjhkese vualkeme, aajne dïhte gie våålese båateme: Almetjebaernie dïhte *gie elmierïjhkesne•. 14 Guktie Mose gïermesjem saadtestahkesne gævnjoesti, nemhtie Almetjebaernie edtja bæjjalgidh 15 juktie fïereguhte gie dïsse jaahka, ihkuve jieledem åådtje. 16 Nemhtie Jupmele eatnemem eahtseme guktie aajnehke baerniem vedtieji guktie dah gïeh altasasse jaehkieh, eah galkh jaemedh mohte ihkuve jieledem åadtjoeh. 17 Ij leah Jupmele baernebem eatnamasse raajeme eatnemem dööpmedh. Eatnemem edtja hov gorredidh. 18 Dïhte gie dïsse jaahka, ij dööpmesovvh. Dïhte gie ij jaehkieh, joe dööpmesovveme juktie ij Jupmelen aajnehke baarnan jaahkeme. 19 Jïh daate dåapmoe, gosse tjoevke eatnamasse bööti, dellie almetjh jemhkeldem iehtsieh vielie goh tjoevkem juktie dej åssjalommesh leah bahha. 20 Dïhte gie bahhasvoetem dorje, tjoevkem væssjohte jïh ij tjoevken gåajkoe båetieh, olles dan dahkoeh edtjh gåvlahtovvedh. 21 Mohte dïhte gie saetniesvoetesne jeala, tjoevken gåajkoe båata. Dellie gaajhkesh vuejnieh dïhte dorje dam maam Jupmele sæjhta.»
Jåhha Jeesusen bïjre vïhnesje
22 Dan mænngan Jeesuse jïh jïjtse learohkh Judejese mïnnin. Desnie Jeesuse jïh learohkh naan biejjieh sjïdtin jïh almetjh laavkoejin. 23 Jåhha aaj Ainonesne Salimen lïhke, almetjh laavkoeji juktie desnie tjaetsie. Almetjh dahkoe böötin lååvkesovvedh. 24 Jåhha ij lij annje faangkegåatan beelhkesovveme. 25 Dellie såemies Jåhhan learoehkijstie eelkin naan juvdeladtjigujmie dijveldidh guktie raajne sjïdtedh. 26 Dah Jåhhan gåajkoe veedtsin jïh jeehtin: «Rabbi, dïhte guhte datnine Jordanen dunnie bielesne, jïh gïen bïjre datne vïhnesjih, dïhte aaj laavkoeminie, jïh gaajhkh almetjh dan gåajkoe båetieh.» 27 Jåhha vaestiedi: «Ij gie maam åadtjoeh mij ij elmierïjhkeste båetieh. 28 Jïjtjh lidie govleme maam jeehtim: Im leah Messija. Manne raajesovveme dan åvtelen vaedtsedh. 29 Provrese-ålma dïhte, gïen provrese-nïejte lea. Provrese-ålman voelpe dam golteleminie jïh aavode gosse dan gïelem gåvla. Dïhte aavoe munnjien daelie ellies. 30 Dïhte stuerebe sjædta, manne jis unnebe.
31 Dïhte gie elmierïjhkeste båata, gaajhkesijstie stuerebe. Dïhte gie veartanistie båata, veartanisnie lea jïh veartenen bïjre soptseste. Dïhte guhte elmierïjhkeste båata, 32 såårne maam vuajneme jïh govleme. Læjhkan ij gie sïjhth goltelidh. 33 Dïhte gie sæjhta altemse goltelidh, nænnoste Jupmele saatnan soptseste. 34 Dïhte gïem Jupmele raajeme, Jupmelen baakoeh hååle. Jupmele Voejkenem vadta guktie gaajhkem deavhta. 35 Aehtjie Baerniem eahtsa jïh gaajhkem altese gïeten nualan bïejeme. 36 Dïhte gie Baarnan jaahka, dan lea ihkuve jielede. Mohte dïhte gie ij Baarnan jaehkieh, ij jieledem vuejnieh. Jupmele saknojne dam heajhta.»