Jeesuse jïh nyjsenæjja Samariaste
1 Dellie Jeesuse guarkaji fariseladtjh åådtjeme govledh satne jienebh learohkh vitneme goh Jåhha jïh jienebh laavkome. 2 Idtji gujht Jeesuse jïjtje naan almetjh lååvkeme, jïjtse learohkh dah. 3 Dellie Judejeste vihth Galilejese vöölki. 4 Tjoeri Samarian tjïrrh mïnnedh 5 jïh dellie staarese bööti man nomme Sykar. Staare ij man guhkie ïentjeste maam Jaahke jïjtse alkan, Josefasse, vadteme. 6 Desnie Jaahken prutnie. Jeesuse fealadimmeste syjleme, tjihkedi prutnien baalte. Gaskebiejjie lij.
7 Dellie nyjsenæjja Samarian luvhtie båata tjaetsiem veedtjedh. Jeesuse dïsse jeahta: «Vedtesth munnjien tjaatsetjem.» 8 Learohkh gïehtjh staaresne mïnneme beapmoeh åestedh. 9 Nyjsenæjja jeahta: «Guktie datne gie juvdeladtje, mannem gihtjh tjaetsien mietie? Manne hov nyjsenæjja Samarian luvhtie.» Eah juvdeladtjh sïjhth samarialadtjigujmie årrodh. 10 Jeesuse dellie vaestede: «Jis Jupmelen vadtese dutnjien åehpie lij jïh datne daajreme gie tjaatsetjem aanoesti, dellie datne altemse gihtjeme tjaetsiem vedtedh, jïh ojhte dïhte jielije tjaetsiem dutnjien vadteme.» 11 Nyjsenæjja dellie jeahta: «Åejvie, dov ij naan lihtie mejnie voelmesth, jïh prutnie dan gïengele. Gustie dellie jielije tjaetsiem edtjh vaeltedh? 12 Mejtie datne stuerebe mijjen maadter-aehtjie Jaahkeste gie mijjese prutniem vedtieji jïh jïjtje destie jovki, dovne jïjtse elkieh jïh kluhterh?» 13 Jeesuse vaestede: «Dïhte gie daehtie tjaetseste jåvka vihth gajhkelåvva. 14 Mohte dïhte gie tjaetseste jåvka maam manne vadtam, ij gåessie gænnah gajhkelovvh. Dïhte gie mov tjaetseste jåvka, dan sisnie gaaltije sjædta jïh destie tjaetsie galka jïh ihkuve jieledem vadta.» 15 Nyjsenæjja jeahta: «Åejvie, vedtieh munnjien dehtie tjaetseste, ollem gåessie gænnah gajhkelovvh jïh im daarpesjh diekie tjaetsiem veedtjedh!»
16 Dellie Jeesuse jeahta: «Veedtjh geellebem!» 17 Nyjsenæjja vaestede: «Ij mov naan geelle.» Jeesuse jeahta: «Reaktoe hov gosse jeahtah ij dov naan geelle. 18 Vïjhte geellh leah åtneme, jïh dïhte guhte daelie dov luvnie, ij leah dov geelle. Datne hov saatnan soptsestamme.» 19 Nyjsenæjja vaestede: «Åejvie, manne govlem datne profeete. 20 Daennie vaeresne mijjen maadtoe Jupmielasse tjåårveme, mohte dijjieh jiehtede, sijjie gusnie Jupmielasse rohkelidh, lea Jerusalemesne.» 21 Jeesuse jeahta: «Nyjsenæjja, jaehkieh mannem, biejjie golh båata gosse idie galkh daennie vaeresne jallh Jerusalemesne Aahtjan rohkelidh. 22 Dijjieh ammesidie tjåarvode. Mohte mijjieh tjåarvobe dïsse gie mijjese åehpie, juktie gorredimmie juvdeladtji luvhtie båata. 23 Biejjie båata, joe daesnie lea, gosse gaajhkesh gïeh saetnieslaakan rohkelieh, edtjieh Aahtjan voejkenisnie jïh saetniesvoetesne rohkelidh. Nemhtie Aehtjie sæjhta edtjebe sutnjien rohkelidh. 24 Jupmele voejkene lea jïh dah gïeh dïsse rohkelieh, tjuerieh voejkenisnie jïh saetniesvoetesne rohkelidh.» 25 Nyjsenæjja jeahta: «Daajram Messija båata» – dïhte lea Kristuse – «jïh gosse båata, dellie mijjem gaajhkem daejrehte.» 26 Dellie Jeesuse nyjsenæjjese jeahta: «Manne dïhte guhte datnine soptsesteminie.»
Jeesuse jïh samarialadtjh
27 Dellie Jeesusen learohkh båetieh. Dah jis bååhperieh gosse Jeesuse nyjsenæjjine soptsesteminie. Ij gie gihtjh maam sæjhta jallh mannasinie dejnie soptsesteminie. 28 Nyjsenæjja tjaetsielihtiem laahpa jïh staarese vaarra såårne: 29 «Båetede, vuejnede ålmam gie munnjien soptsestamme gaajhkem maam manne dorjeme! Mejtie sån Messija?» 30 Staareste vaerrieh Jeesusem ohtsedidh.
31 Gosse nyjsenæjja vöölki, learohkh Jeesusasse jiehtieh: «Rabbi, båetieh byöpmedh.» 32 Dellie Jeesuse vaestede: «Mov lea beapmoe maam idie daejrieh.» 33 Learohkh dellie sinsitnien jiehtieh: «Mejtie sån gie Jeesusasse beapmoeh buakteme?» 34 Jeesuse jeahta: «Mov beapmoe lea altese syjhtehtassem darjodh gie mannem raajeme jïjtse barkoem illedh. 35 Jiehtede hov: njieljie askh vielie, dellie dokseme-aejkie. Mohte manne jeahtam: vuartasjidie guktie ïentjh joe vyölkedamme! 36 Dïhte gie dåksa, baalhkam åådtje, sjædtojde ihkuve jieliemasse åabpa juktie dïhte gie seejeme jïh dïhte gie dokseme, åadtjoejægan aavoedalledh. 37 Saatnan jiehtieh: mubpie seejie jïh mubpie dåksa. 38 Manne dijjem raajeme doksedh desnie gusnie idie barkeme. Jeatjebh leah barkeme jïh dijjieh baalhkam åadtjode dej barkoej åvteste.»
39 Gellie samarialadtjh dehtie staareste nyjsenæjjan saernien gielhtie Jeesusem jaahkajin gosse nyjsenæjja saarnoeji: «Munnjien hov såårneme gaajhkem maam manne dorjeme.» 40 Jeesusen gåajkoe böötin, sïjhtin edtja dej luvnie årrodh, jïh ojhte göökte biejjieh beetsi. 41 Jienebh jaahkajin gosse govlin Jeesuse jïjtje saerniedi, 42 jïh nyjsenæjjese jeehtin: «Ibie vielie aajne dov saernien gielhtie jaehkieh. Daelie jïjtjh govleme jïh daejrebe dïhte amma eatnemen lutniestæjja.»
Åejvieladtjen baernie starna
43 Göökte biejjieh dan mænngan Jeesuse Galilejese veedtsi. 44 Jïjtje lij vïhnesjamme: ij profeeten naan gåvladahke hïejmedajvesne. 45 Gosse dellie Galilejan gåajkoe bööti, altemse desnie åajvoehlaakan dåastoehtieh juktie galilejaladtjh gaajhkem jïjtjh vuajneme maam bissiebiejjine Jerusalemesne dorjeme.
46 Bööti Kaneste bååstide Galilejan gåajkoe gusnie tjaetsiem vijnine darjoeji. Kafar-naumesne gånkan gaagkijen baernie skïemtjes. 47 Gosse gaagkije gåvla Jeesuse Judejeste Galilejese båateme, Jeesusem ohtsede jïh gihtjie mejtie Kafar-naumese maahta båetedh jïjtse aesmeles baerniem starnedehtedh. 48 Jeesuse dïsse jeahta: «Jis idie væhtah åadtjoeh jïh åavtoeh vuejnieh, idie dellie jaehkieh.» 49 Åvtehke dellie jeahta: «Båetieh, Åejvie, aerebe goh baarneme sealede!» 50 Jeesuse vaestede: «Vaedtsieh gåatan, dov baernie jeala!» Jïh ålma jaahka dam maam Jeesuse jeahta. Jïh vaadtsije. 51 Gosse gåatan vaedtsieminie, dellie deanerh båetieh gaavnesjidh jïh saarnoeh baernie jielieminie. 52 Dellie ålma gihtjie gåessie baernie buaranamme. Dellie vaestiedieh: «Jååktan, tjïjhtjeden tæjmoen, dellie vaejlie luejhtieli.» 53 Dellie aehtjebe aerviedi nemhtie sjïdti gåessie Jeesuse sutnjien jeehti: «Dov baernie jeala.» Ålma jïh jïjtse fuelhkie jaahkoles sjïdtin. 54 Daam mubpiem væhtam Jeesuse darjoeji gosse Judejeste Galilejese bööti.