Vijsies luvliegassjh Jeesusem earoehtieh
1 Dellie gosse Herodes gånkine jïh Jeesuse Bet-lehemesne Judejesne reakadi, dellie naan vijsies luvliegassjh gïeh naestide gïehtjedamme, Jerusalemese böötin 2 gihtjin: «Gusnie juvdeladtji aadtjetje reakadamme gånka? Mijjieh altese naestiem vuajneme jïh båateme altemse heevehtidh.» 3 Gosse gånka Herodes dam gåvla, arhtijahtja jïh gaajhkesh dovnesh abpe Jerusalemesne. 4 Gaajhki åvtehkehearraj jïh tjaaleh-åahpetji gujmie soptseste jïh gihtjie gosse Messija edtja reakadidh. 5 Dah vaestiedieh: «Bet-lehemese, Judejese, naemhtie profeete tjaaleme:
6 Datne Bet-lehem Judejesneih leah unnemes Judejan åvtehkijstiejuktie dov luvhtie åejvie båata,Jisraelem, mov åålmegem, ryöjnesjidh.»7 Dellie Herodes naestieguarkijidie tjeakolde gåhtjoeji jïh govlehtalli gåessie naestie vååjnesisnie. 8 Jïh dan mænngan dejtie stilli Bet-lehemese vuelkedh: «Vuelkede dahkoe jïh goerehtidie gaajhkem maanan bïjre jïh bievnede munnjien gosse maanam gaavneme guktie manne aaj dahkoe maahtam vuelkedh dam heevehtidh!» 9 Gosse govleme maam gånka jeahteme, dahkoe mïnnin jïh naestie maam vuajneme, baalkam vuesiehti gossege tjöödtjesti sijjien bijjelen gusnie maana. 10 Gosse naestiem vööjnin, dellie stoere aavosne sjïdtin. 11 Gåatan tjaangin jïh desnie maanam jïh Maarjam, tjidtjebem gaavnin. Boelvestin jïh maanam heevehtin. Jïjtsh gæstojde rïhpestin jïh vadtesh geelkin: gulliem, roengem jïh myrram. 12 Mænngan bïevnesh åadtjoejin gosse nïekedin: aellede bååstide Herodesen gåajkoe jarkah! Dellie gajvin jïh jïjtsh laantese vöölkin.
Baatarimmie Egyptese
13 Gosse lin vualkeme, Jupmelen eengkele Josefasse volverimmesne jeahta: «Tjuedtjelh vaeltieh maanam jïh tjidtjebem jïh baataridie Egyptese! Årrode desnie gossege dutnjien soptsestem juktie Herodes maanam ohtsede dam buvvedh.» 14 Dan jïjjen Josef tjuedtjele, maanam jïh tjidtjebem Egyptese voelkehte, 15 jïh desnie orre gossege Herodes sealadamme. Nemhtie sjïdti guktie Jupmele profeetide stilleme soptsestidh:
Egypteste baarnemem leam gohtjeme.Buvveme Bet-lehemesne
16 Gosse Herodes aajhtsi satne naestieguarkijijstie beahtahtalleme, måarahtovvi. Baaji Bet-lehemesne jïh dennie dajvesne gaajhkide baernide gïeh göökten jaepien båeries jïh nuerebe, båvvalgidh. Govleme naestieguarkijijstie man båeries dïhte baernie. 17 Dellie sjïdti guktie profeete Jeremia beavneme:
18 Ramesne aejvierdimmieh govloeh,tjyörenassh jïh ryögkehke ojkesimmieh:Rakel maanide sorkoe.Ij sïjhth jaskedhjuktie dah eah vielie aajmojne leah.Bååstide Jerusalemese
19 Gosse Herodes jaameme, Jupmelen eengkele Josefasse Egyptesne volverimmesne 20 jeehti: «Tjuedtjelh vaeltieh maanam jïh tjidtjebem jïh vuelkieh Jisraelen laantese! Dah gïeh sijhtieh maanam buvvedh, leah jaameme.» 21 Josef tjuedtjieli maanam jïh tjidtjebem veelti jïh bååstide Jisraelen laantese juhtieji. 22 Gosse govli Arkelaios gånkine Judejesne aehtjeben Herodesen mænngan, idtji doesth dahkoe juhtedh. Nïekedi edtji Galilejese vuelkedh. 23 Dellie staaresne årroeji, man nomme Nasaret. Nemhtie sjïdti guktie profeete beavneme, dïhte edtja nasareteladtjine gohtjesovvedh.