Laemies ålma
1 Biejjieh dan mænngan Jeesuse Kafar-naumese vihth bööti jïh almetjh govlin gåetide båateme. 2 Dan jïjnjh almetjh tjåanghkenin guktie idtjin gåatan tjaakenh, idtjin oksen bæjngolen gænnah. Baakoem saarnoeji. 3 Dellie laemies ålmam Jeesusen gåajkoe buektieh. Dam njieljie gaarmanæjjah guedtieminie. 4 Juktie dan jïjnjh almetjh desnie eah Jeesusen gåajkoe baahtsh, dellie rehpiem Jeesusen aatsolen gajhkoelieh. Gosse raejkiem buektiehtieh, dellie jievegem badtehtieh gusnie laemies ålma gællan. 5 Gosse Jeesuse dej jaahkoem vuajna, dellie laemies ålmese jeahta: «Elkie, dov sådtoeh leah datneste luajhtaldihkie.»
6 Naan tjaaleh-åahpetjh gïeh desnie tjahkan, ussjedin: 7 «Guktie amma dohte jis soptseste? Jupmelem aahpelde! Jupmele maahta almetjijstie sådtoeh luejhtedh, gie jeatjebe?» 8 Jeesuse jïjtse voejkenisnie aajhtsa maam ussjedieh, jïh dellie jeahta: «Guktie nemhtie ussjedidie? 9 Mij aelhkebe, laemies ålmese jiehtedh: ‘Dov sådtoeh datneste luajhtasovveme’, vuj: ‘Tjuedtjelh, vaeltieh dov jievegem jïh vaedtsieh gåetide’? 10 Juktie daejredh edtjede: Almetjebaernien faamoe daennie eatnamisnie sådtoeh luejhtedh.» Dellie laemies ålmese jeahta: 11 «Manne dutnjien jeahtam: Tjuedtjelh, vaeltieh dov jievegem jïh vaedtsieh gåetide!» 12 Dellie tjuedtjele, jievegem vaalta jïh olkese vaadtsa. Gaajhkesh dam vööjnin jïh geagkarin juktie dan sagke råvnasjin. Jupmelem earoehtin jïh jeehtin: «Ibie leah gåessie aerebe daagkerem vuajneme.»
Jeesuse Levim learoehkinie gohtje
13 Jeesuse vihth jaevriebealese vaadtsa. Gaajhke krirrie altese gåajkoe båata, jïh Jeesuse ööhpehte. 14 Gosse tåallere-gåetiem vaasa, dellie Levim, Alfaiosen elkiem aajhtsa desnie tjahkan. Dïsse jeahta: «Dåeredh mannem!» Jïh dïhte tjuedtjele Jeesusem dåerede.
15 Dan mænngan Jeesuse Levin gåetesne guessine, jïh desnie jïjnjh tåallerh jïh sådterh tjahkan Jeesusinie jïh learohkigujmie. Dennie mieresne jïjnjh almetjh Jeesusem dåeredeminie. 16 Gosse dah fariseladtjh gïeh tjaaleh-åahpetjh leah, Jeesusem vuejnieh sådterh jïh tåallerigujmie byöpmedeminie, dellie learoehkidie jiehtieh: «Dohte jis tåallerigujmie jïh sådterigujmie aktesne byöpmede.» 17 Dam Jeesuse gåvla jïh dellie jeahta: «Verries almetjh eah dåakterem daarpesjh, mohte skïemtje almetjh. Im båateme dejtie tjåarvodh gïeh rïektesvoetesne, mohte sådtaridie edtjem tjåarvodh.»
Faastoen bïjre
18 Jåhhan jïh fariseladtji learohkh fååstin, jïh såamesh dejstie Jeesusen gåajkoe båetieh jïh gihtjieh: «Jåhha jïh fariseladtji learohkh fååsteminie. Guktie eah dov learohkh aaj?» 19 Dellie Jeesuse vaestede: «Dagke provrese-ålman voelph maehtieh fååstedh mearan provrese-ålmine leah, eah dah maehtieh gænnah fååstedh. 20 Gosse provrese-ålma ikth dej luvhtie vaaltasåvva, dellie gelkieh fååstedh.
21 Ij gie orre doengesem båeries gaarvose gåaroeh. Juktie dellie dïhte orre doengese stoere stuhtjem båeries gåptoste gejhkele, jïh raejkie stuerebe sjædta. 22 Ij gie båeries skåerrie-voessem orre vijnine dievhtieh. Juktie dellie voesse gajhkene, jïh vijne deajese vualka. Orre vijne galka orre voesside!»
Sabbaaten bïjre
23 Gosse Jeesuse sabbaaten saajoe-laantem vaedtsieminie, dellie learohkh aelkieh aaksh tjöönghkedh. 24 Fariseladtjh jis jiehtieh: «Vuartasjidie! Guktie doh numhtie guktie ij sabbaaten åadtjoeh darjodh?» 25 Jeesuse vaestede: «Idie gåessie lohkeme guktie David dåemiedi gosse jïjtse almetji gujmie nïeresne jïh nealkoeminie? 26 Jupmelen gåatan tjaangi gosse Evjatar lij åvtehkehearrine. Jïh David byöpmedi aejlies laejpijste mejtie ajve hearrah åadtjoejin byöpmedidh. Dejstie jïjtse almetjidie aaj vedtieji.» 27 Jïh Jeesuse jeahta: «Sabbaate almetji gaavhtan, eah leah almetjh sabbaaten gaavhtan. 28 Nemhtie dam Almetjebaernie sabbaaten aaj åejvie.»