Almetjh tjåanghkeneminie
7 Jeesuse learohki gujmie jaevriebealese vaadtsaji. Jïjnjh almetjh abpe Galilejeste dåeredeminie. 8 Dovne Judejeste, Jerusalemeste, Idumejeste jïh Jordanen luvliebieleste tjåanghkenin; jïh Tyrosen jïh Sidonen dajvijste jïjnjesh Jeesusen gåajkoe böötin juktie saerniem govleme gaajhken bïjre maam lij dorjeme. 9 Jeesuse learoehkidie jeahta edtjieh vïnhtsine riejries, jis almetjh altese gåajkoe tjarke tjihtedieh. 10 Jïjnjesidie starnedehtieji guktie gaajhkesh gïeh skïemtjes, Jeesusen gåajkoe tjihtedin altemse doehtedidh. 11 Gosse doen´aajmoeh Jeesusem vööjnin, dellie altese uvte slienghkiehtin jïh gæljoejin: «Datne leah Jupmelen Baernie!» 12 Jeesuse narhtoeli: «Aellede mov bïjre saarnoeh!»
Jeesuse luhkiegööktesidie learoehkinie gohtje
13 Dellie vaaran vaarresti. Tjåarvoeji dejtie giejtie sïjhti, jïh dah böötin. 14 Luhkiegööktesidie veelji jïjtjemse dåeriedidh juktie dejtie edtji saerniedæjjine raajedh. 15 Dah edtjin faamojne doen´aajmoeh aeskielidh. 16 Luhkiegööktesidie veelji: Simonem maam Pïehterinie gåhtjoeh, 17 Sebedaiosen elkide: Jaahke gonnoeh Jåhham – dejtie gööktesidie Boanergesine, raejrien elkine gåhtjoejin – 18 Andreasem, Filippos gonnoeh Bar-Tolomaiosem, Meehtem, Alfaiosen elkide: Tåamma gonnoeh Jaahkem, Taddaiosem jïh Kananaiosen Simonem 19 jïh Judas Iskariotem gie Jeesusem biehtieji.
Jeesuse doen´aajmojste faamohkåbpoe
20 Gosse gåetide bööti, almetjh vihth tjåanghkenin guktie Jeesuse jïh learohkh idtjin asth byöpmedidh gænnah. 21 Gosse Jeesusen fuelhkie dam govli, veedtsin Jeesusem veedtjedh juktie jiehtieh: «Uvre jiermehth lea.»
22 Jïh tjaaleh-åahpetjh Jerusalemeste jis jiehtieh: «Doete Be-elsebulen aajmosne! Doenide doen´aajmoen åvtehkinie aeskele!» 23 Dellie Jeesuse dejtie tjåarvoeji jïh såemies viertiedassine vaestede: «Dagke Satan jïjtjemse olkese dåålve? 24 Jis rïjhke jïjtsinie dååre, ij rïjhke man guhkiem tjåadtjoeh. 25 Jis gåetien almetjh sinsitnine gæmhpoeh, ij dïhte fuelhkie man guhkiem veasoeh. 26 Jis Satan jïjtsinie dåårije jïh gymhpe, ij dïhte dellie man guhkiem tjåadtjoeh, ij leah dïhte vielie. 27 Ij gie gænnah maehtieh veaksahkåbpoen gåatan tjaangedh jïh dan eekem sualadidh aerebe goh dam veaksahkåbpoem veadteme. Dellie maahta dan gåeteste sualadidh.
28 Saatnan, manne dijjese jeahtam: Jupmele edtja almetjidie gaajhkeste luejhtedh, sådtojste jïh aahpeldimmeste, seamma man jïjnjem aahpeldamme. 29 Mohte dïhte gie Aejlies Voejkenem aahpelde, ij destie ihkuve aajkan luajhtasovvh juktie dïhte ihkuve sådtojne lååjkehke sjïdteme.» 30 Dam jeehti juktie lin jeahteme: «Dïhte doen´aajmosne.»
Jeesusen fuelhkie
31 Jeesusen tjidtjie jïh vïellh böötin gåetien bæjngoelasse tjöödtjehtin jïh dïjrem gåatan raajin, Jeesuse tjuara olkese båetedh. 32 Jïjnjh almetjh Jeesusen luvnie, jïh såamesh jeehtin: «Tjædtjedh jïh vïelledh ålkene dov mietie gihtjieh.» 33 Dellie vaestede: «Gie mov tjidtjie jïh gïeh mov vïellh?» 34 Dellie vuartesje dejtie gïeh jïjtse bïjre tjahkan jïh jeahta: «Daesnie hov tjædtjeme jïh vïellh! 35 Dïhte gie Jupmelen syjhtehtassem dorje, dïhte mov vïelle, mov åabpa jïh mov tjidtjie!»