Jupmele gaajhkh almetjh dööpmie
1 Dellie ij naan vaarjelimmie dutnjien gie dööpmh, seamma saaht gie datne leah. Gosse jeatjah almetjem dööpmh, dellie jïjtjemdh dööpmh. 2 Daejrebe Jupmele saetniesvoetine dööpmie dejtie gïeh dööpmeminie. 3 Datne gie dejtie dööpmh gïeh dööpmieh jïh jïjtje dööpmh, vïenhth maahtah Jupmelen dåapmoste lïepedh? 4 Jallh datne væssjohth altese ålvoes stoere gïemhpesvoetem, vïssjelesvoetem jïh guktie Jupmele datnine arhpa. Ih guarkah Jupmelen gïemhpesvoete datnem trumhpeste jarkedh? 5 Dov garre vaajmoe mij ij sïjhth jarkedh, saknoeh dutnjien dåapmoebeajjan tjöönghkie gosse galkebe vuejnedh Jupmele reaktojne dööpmie. 6 Guktie gaajhkesh dåemiedamme, edtja dejtie beelhkedh: 7 Dah gïeh vïssjele darjoeh dam mij hijven, jïh hearlohkevoetem jïh earoem tjohtjoeh jïh dam mij ihkuve aajkan lea, ihkuve jieledem åadtjoeh. 8 Dah gïeh saetniesvoetem jïjtje-råårehkelaakan hiejhtieh jïh meadtahtellieh, gelkieh saknoem jïh bysvehtassem åadtjodh. 9 Neavroe jïh asve dejtie gelkieh båetedh gïeh nåake dåemiedieh, voestegh juvdeladtjide jïh mænngan grekeladtjide. 10 Dah edtjieh hearlohkevoetem, earoem jïh raeffiem åadtjodh gïeh hijvenlaakan dåemiedieh, voestegh juvdeladtjh jïh mænngan grekeladtjh. 11 Juktie Jupmele ij joekehtassh almetji gaskem darjoeh.
12 Gaajhkesh gïeh laaken namhtah sådtoedamme, gelkieh laaken namhtah smualkedh. Jïh gaajhkesh gïeh laakine sådtoedamme, gelkieh laakine dööpmesovvedh. 13 Juktie eah dah gïeh laakem guvlieh, rïektesvoetesne Jupmelen uvte leah. Ijje, dah gïeh laakem jeakadieh, dah rïektesvoetesne leah. 14 Gosse jeatjah-jaahkoeladtjh gïej ij naan laake, jïjtsh mïelen mietie darjoeh dam maam laake stillie, dellie dej lea jïjtse laake jalhts eah dah laakem åådtjeme. 15 Dellie vuesiehtieh laaken stillemh dej vaajmojde tjaalasovveme. Dej mïelh aaj dam vuesiehtieh gosse dej åssjalommesh jïjtjemsh bielhkieh jallh vaarjelieh. 16 Dam gujht vuejnebe dan biejjien gosse Jupmele Jeesus Kristusinie dööpmie dam mij almetjidie tjeakoes. Gaajhkem dam leam mov vaentjielisnie saerniestamme.