Jaahkoen rïektesvoete
21 Daelie Jupmele rïektesvoetem laaken namhtah vuesiehtamme. Dan bïjre laake jïh profeeth vïhnesjamme. 22 Daate Jupmelen rïektesvoete mij vadtasåvva dejtie gïeh Jeesus Kristusasse jaehkieh. Ij naan joekehts leah 23 juktie gaajhkesh sådtoedamme jïh Jupmelen hearlohkevoetem dasseme. 24 Jalhts dah eah vyörtege maam joem åadtjodh, Jupmelen aarmoen gielhtie åadtjoeh skåltohth reaktan uvte tjåadtjodh juktie Kristus Jeesuse dej skåltoem maakseme. 25 Jupmele baaja Jeesusen vïrrem sjïeline sjïdtedh dejtie gïeh jaehkieh. Nemhtie sïjhti jïjtse rïektesvoetem vuesiehtidh. Aerebe hov vïssjele orreme dej sådtoejgujmie. 26 Daelie sæjhta jïjtse rïektesvoetem vuesiehtidh: rïektesvoetesne jïjtje lea, jïh dïhte gie Jeesusasse jaahka.
27 Mestie maehtebe dellie tjievliedidh? Ij mestie gænnah! Magkeres laake dam jeahta? Dahkoen laake? Ijje, jaahkoen laake dam jeahta. 28 Juktie vïenhtebe almetje rïektesvoetem jaahkoste åådtje jïh ij dahkojste åadtjoeh. 29 Dagke Jupmele ajve juvdeladtji Jupmele? Ij leah gaajhki åålmegi Jupmele? Nov badth, dej Jupmele aaj. 30 Juktie aajnehke Jupmele lea gie jaahkojne rïektesvoetem dejtie vadta gïeh bïjretjoehpesovveme jïh dejtie gïeh eah bïjretjoehpesovveme. 31 Orrijehtebe dellie laakem jaahkojne? Ijje, amma! Laakem vihtiestibie.