Esekiel

Vearreprofehtaid duopmu

¹ Munnje bođii dát Hearrá sátni: ² “Olmmoš, profehtastala daid profehtaid vuostá geat profehtastallet Israelis. Cealkke daidda geat profehtastallet dan mii ain báhčá millii: Gullet Hearrá sáni. ³ Ná cealká Hearrá Ipmil: Vuoi daid jierpmehis profehtaid geat guorrasit iežaset jurdagiidda, vaikko eai leat oaidnán makkárge oainnáhusaid. ⁴ Du profehtat, Israel, leat dego riebanat viessobázahasain. ⁵ Ehpet dii leat gorgŋon muvraluoddanemiide ehpetge divvon muvrra israellaččaid birra, vai sii biđášedje soađis Hearrá beaivvi. ⁶ Sin oainnáhusat leat behtolaččat ja sin einnostusat giellásat. Sii dadjet: ‘Dát lea Hearrá sátni’, vaikko Hearrá ii leat vuolggahan sin. Ja liikká sii vurdet su diktit sin sániid ollašuvvat! ⁷ Muhto dat oainnáhusat maid dii oaidnibehtet leat behtolaččat, ja dat einnostusat maid dii sárdnubehtet leat giellásat. Dii dadjabehtet: ‘Dát lea Hearrá sátni’, vaikko mun in leat sárdnon. ⁸ Dan dihte cealká Hearrá Ipmil: Danin go din sánit leat behtolaččat ja din oainnáhusat giellásat, de mun čuožžilan din vuostá. Dát lea Hearrá Ipmila sátni. ⁹ Mun časkkán daid profehtaid geaid oainnáhusat leat behtolaččat ja geaid einnostusat leat giellásat. Sii eai oaččo gullat mu álbmoga čoakkalmassii, sii eai oaččo čállojuvvot israellaččaid sohkalogahallamii eaige boahtit Israela eatnamii. Dalle dii ipmirdehpet ahte mun lean Hearrá Ipmil.

¹⁰ Sii leat čádjidahttán mu álbmoga ja dadjan: ‘Ráfi’, vaikko ráfi ii leat. Sii kálkejit seainni maid álbmot lea ceggen. ¹¹ Daja dan dihte daidda kálkejeddjiide: ‘Din seaidni gahččá.’ Boahtá ráššoarvi, čuorpmasta ja riđđuda. ¹² Ja go seaidni gahččá, de olbmot jerret dis: ‘Gos dál lea kálka maid dii sihkuidet?’ ¹³ Dan dihte cealká Hearrá Ipmil: Moaristan mun divttán riđu gaikut, mu suhttu vuolggaha ráššoarvvi ja mu moarri duššadeaddji čuorbmasiid. ¹⁴ Mun gaikkun dan seainni maid dii leiddet kálken ja norddastan dan eatnamii, nu ahte vuođđudus oidno. Go gávpot gahččá, de dii duššabehtet oktan dainna. Dalle dii ipmirdehpet ahte mun lean Hearrá. ¹⁵ Mun golggahan iežan suhtu seainni ja dan kálkejeddjiid badjelii. Mun cealkkán didjiide: Seaidni ii leat šat, eai leat šat dan kálkejeaddjit, ¹⁶ dat Israela profehtat geat profehtastalle Jerusalema birra ja geat oidne oainnáhusaineaset ráfi, vaikko ráfi ii lean, cealká Hearrá Ipmil.

Vuoi vearreprofehtanissoniid!

¹⁷ Olmmoš, jorgal muođuid iežat álbmoga nissoniid vuostá geat profehtastallet dan mii ain báhčá millii. Profehtastala sin vuostá ¹⁸ ja daja: Ná cealká Hearrá Ipmil: Vuoi din geat goarrubehtet báttiid olbmuid giehtaruohttasiidda ja duddjobehtet beaittaliinniid buohkaide, sihke stuorráide ja smávváide, vai beassabehtet bivdit olbmuid. Áigubehtetgo dii bivdit olbmuid mu álbmogii vahágin ja diktit earáid eallit alcceseattet ávkin? ¹⁹ Dii heahppášuhttibehtet mu mu iežan álbmoga čalmmiin muhtin bivgečorpmas ja moatti láibebihtás. Dii goddibehtet daid geat eai livčče galgan jápmit ja diktibehtet eallit daid geat eai livčče ožžon eallit. Dii gielistehpet mu álbmoga mii liiko guldalit giellásiid. ²⁰ Dan dihte cealká Hearrá Ipmil: Mun válddán daid báttiid maiguin dii bivdibehtet olbmuid. Mun gaikkihan daid din gieđas, ja mun luoittán luovus daid olbmuid geaid dii lehpet bivdán. ²¹ Mun gaikkun din beaittaliinniid ja gájun iežan álbmoga din gieđas, eaige sii šat šatta din sálašin. Dalle dii ipmirdehpet ahte mun lean Hearrá.

²² Dii hearddohuhtiidet vanhurskása almmá siva haga, vaikko mun in leat goassige váivvidan su, muhto ipmilmeahttuma dii lehpet roahkasmahttán, vai son ii jorgalivčče bahás geainnustis iige bestojuvvoše. ²³ Dan dihte din behtolaš oainnáhusat ja einnostusat nohket. Mun gájun iežan álbmoga din gieđas. Dalle dii ipmirdehpet ahte mun lean Hearrá.”