Esekiel

Várrehus eahpeipmilbálvaleddjiide

¹ Muhtun Israela vuorrasat bohte mu lusa ja čohkánedje mu ovdii. ² Dalle bođii munnje dát Hearrá sátni: ³ Olmmoš, dát olbmát leat addán váimmuset eahpeipmiliidda, sii leat bidjan muođuideaset ovdii dakkára mii jorralahttá sin suddui. Singo mun divttášin jearrat alddán ráđi? ⁴ Sártno sidjiide ja daja: Ná cealká Hearrá Ipmil: Jos israellaš lea addán váimmus eahpeipmiliidda ja bidjan muođuidis ovdii dakkára mii jorralahttá su suddui, muhto dattetge boahtá profehta lusa, de mun, Hearrá, ieš attán sutnje dakkár vástádusa maid su eahpeipmilbálvalus ánssáša. ⁵ Mun suorggahan israellaččaid, danne go sii buohkat leat hilgon mu ja bálvalit eahpeipmiliiddiset.

⁶ Daja israellaččaide: Ná cealká Hearrá Ipmil: Jorgalehket! Jorgalehket eahpeipmiliinnádet, jorgalehket buot fastivuođaineattet. ⁷ Jos israellaš dahje dakkár gii ássá vierisin Israelis, luohpá mus ja addá váimmus eahpeipmiliidda ja bidjá muođuidis ovdii dakkára mii jorralahttá su suddui, muhto dattetge boahtá profehta lusa jearrat mus ráđi, de mun, Hearrá, ieš attán sutnje vástádusa. ⁸ Mun jorgalan muođuid dan olbmá vuostá ja dagan su mearkan ja sátnevájasin, ja mun jávkadan su iežan álbmogis. Dalle dii ipmirdehpet ahte mun lean Hearrá. ⁹ Muhto jos profehta fillehallá sárdnut, de mun, Hearrá, ieš lean fillen dan profehta. Mun geigen gieđa su vuostá ja duššadan su álbmogisttán Israelis. ¹⁰ Goappašagat ráŋggáštuvvoba, sihke profehta ja dat gii jearai sus ráđi oažžuba seammá ráŋggáštusa, ¹¹ vai israellaččat eai šat čádjidivčče mu luhtte eaige nuoskkidivčče iežaset buot vearredaguineaset. Sii leat mu álbmot ja mun lean sin Ipmil, cealká Hearrá Ipmil.

Jerusalema duopmu bissu

¹² Munnje bođii dát Hearrá sátni: ¹³ Olmmoš, jos eanan sudduda mu vuostá oskkáldasmeahttun daguiguin ja mun geigen gieđa dan vuostá ja divttán láibbi nohkat ja vuolggahan eatnamii nealggi ja duššadan das olbmuid ja omiid, ¹⁴ ja jos Noa, Daniel ja Job livčče doppe, de dát golmmas gájošedje dušše iežaset heakka buot vanhurskkisvuođaineaset, cealká Hearrá Ipmil. ¹⁵ Dahje jos mun luoittán boraspiriid miehtá eatnama goddit dan ássiid, ja oppa eanan šaddá ávdimin iige oktage vádjol doppe spiriid dihte, ¹⁶ ja jos doppe livčče dát golmmas, de siige eai sáhtáše gádjut bártniideaset eaige nieiddaideaset, nu duohta go mun ealán, cealká Hearrá Ipmil. Sii sáhtáše gádjut dušše iežaset heakka, muhto eanan šattašii ávdimin. ¹⁷ Dahje jos mun lokten miehki eatnama vuostá ja gohčun dan hearjidit eatnama ja duššadan das olbmuid ja omiid, ¹⁸ ja jos doppe livčče dát golmmas, de sii eai sáhtáše gádjut bártniideaset eaige nieiddaideaset, nu duohta go mun ealán, cealká Hearrá Ipmil. Sii sáhtášedje gádjut dušše iežaset heakka. ¹⁹ Dahje jos mun vuolggahan dan eatnamii rohttudávdda ja golggahan moarrán dan badjelii, nu ahte mun gottán ja duššadan das olbmuid ja omiid, ²⁰ ja vaikko doppe livčče Noa, Daniel ja Job, nu duohta go mun ealán, cealká Hearrá Ipmil, de sii eai sáhtáše gádjut eai bártni eaige nieidda. Vanhurskkisvuođaineaset sii sáhtáše gádjut dušše iežaset heakka.

²¹ Ná cealká Hearrá Ipmil: Go mun lean vuolggahan Jerusalemii iežan njeallje hirbmatlaš ráŋggáštusa – miehki, nealggi, beađuid ja rohttudávdda – duššadit olbmuid ja omiid, ²² de dattetge báhcet muhtumat geat leat ceavzán, ja sii bohtet din lusa ovttas bártniideasetguin ja nieiddaideasetguin. Ja go dii oaidnibehtet sin eallima ja daguid, de dii oažžubehtet jeđđehusa dan bahás maid mun lean diktán deaividit Jerusalema, buot das maid mun lean diktán deaividit dan. ²³ Dii jeađđašuvvabehtet go oaidnibehtet sin eallima ja daguid. Dalle dii ipmirdehpet ahte in mun almmá siva haga dahkan dan maid dahken, cealká Hearrá Ipmil.