Profetia Israela váriide
1 Olmmoš, profehtastala Israela váriide ja daja: Israela várit, gullet Hearrá sáni! 2 Ná cealká Hearrá Ipmil: Din vašálaččat leat bilkidan din ja dadjan: “Dál duot agálaš dievát leat šaddan min opmodahkan.” 3 Dan dihte profehtastala ja daja: Ná cealká Hearrá Ipmil: Dii lehpet hearjiduvvon ja dulbmojuvvon, ja juohke bealde álbmogat leat oččodeamen din opmodahkaneaset. Dii lehpet šaddan buohkaid baksamiid beakkuheamošin ja bahás ságaid vuložin. 4 Dan dihte, Israela várit, gullet Hearrá Ipmila sáni! Ná cealká Hearrá Ipmil váriide ja dieváide, jogažiidda ja legiide, ávdin viessobázahasaide ja hilgojuvvon gávpogiidda maid buot ránnjáálbmogat leat stajidan ja hiddjidan: 5 Duođaid, cealká Hearrá Ipmil, mun sártnun buolli moaris eará álbmogiid vuostá ja oppa Edoma vuostá. Áccohallamiin ja badjelgeahččanvuođain dat leat váldán mu eatnama oapmineaset.
6 Dan dihte profehtastala Israela eatnama birra ja daja váriide ja dieváide, jogažiidda ja legiide: Ná cealká Hearrá Ipmil: Mun sártnun moaris ja suhtus, danin go eará álbmogat leat hiddjidan din. 7 Ná cealká Hearrá Ipmil: Mun bajidan gieđa ja vuortnun ahte din birasálbmogat ieža šaddet hiddjiduvvot. 8 Muhto dii, Israela várit, runiidehpet fas ja šaddadehpet šaddosiid mu álbmogii Israelii, mii fargga máhccá. 9 Mun boađán din lusa ja jorgalan din beallái, din bealddut jorgojuvvojit ja gilvojuvvojit. 10 Mun divttán ollu olbmuid ássat din vilttiide, oppa Israela álbmoga. Olbmot ásset gávpogiidda, ja viessobázahasat huksejuvvojit fas. 11 Mun divttán ollu olbmuid ja omiid ássat din vilttiide, mun divttán daid leat šattolaččat ja eatnánit. Mun dagan din olbmuid ássanbáikin nugo dolin ja attán didjiide eambbo buriid go ovdal. Dalle dii ipmirdehpet ahte mun lean Hearrá. 12 Mun divttán olbmuid, oppa álbmogan Israela, vádjolit din vilttiin, ja sii váldet din oapmineaset, dii šaddabehtet sin opmodahkan. Dii ehpet šat goassege daga sin mánáheapmin.
13 Ná cealká Hearrá Ipmil: Olbmot lohket du borrat olbmuid ja dahkat iežat álbmoga mánáheapmin. 14 Danin cealká Hearrá Ipmil: It don šat bora olbmuid itge daga iežat álbmoga mánáheapmin 15 inge mun divtte du šaddat gullat vierroálbmogiid bilkosániid. Eará álbmogat eai šat hiddjit du, cealká Hearrá Ipmil.
Israel buhtistuvvo
16 Munnje bođii dát Hearrá sátni: 17 Olmmoš, go israellaččat ásse iežaset eatnamis, de sii dahke dan buhtismeahttumin iežaset vádjolusain ja daguiguin. Sin vádjolus lei mu čalmmiin buhtismeahttun dego nissona mánnosaš buhtismeahttunvuohta. 18 Sii golggahedje vara eatnamis ja dahke dan buhtismeahttumin eahpeipmilgovaideasetguin, ja dan dihte mun gurrejin moarrán sidjiide. 19 Mun biđgejin sin álbmogiid gaskii, ja sii botkkuhuvvojedje vieris eatnamiidda. Mun dubmejin sin nugo sin vádjolus ja dagut ánssášedje. 20 Guđe álbmoga gaskii sii ain bohte, de sii heahppášuhtte mu bassi nama, danin go sin birra daddjojuvvui: “Sii leat Hearrá álbmot, ja dattetge sii leat šaddan vuolgit su eatnamis!” 21 Mun váivašuvven danne go israellaččat heahppášuhtte mu bassi nama daid álbmogiid gaskkas maid gaskii ledje boahtán.
22 Daja dan dihte Israela álbmogii: Ná cealká Hearrá Ipmil: In mun daga din dihte, israellaččat, dan maid dagan, muhto iežan bassi nama dihte maid dii lehpet heahppášuhttán daid álbmogiid gaskkas, maid gaskii lehpet boahtán. 23 Dii lehpet heahppášuhttán mu stuorra nama álbmogiid gaskkas; dat lea heahppášuhttojuvvon, muhto mun basuhan dan. Dainna maid mun dagan didjiide, mun čájehan iežan bassivuođa álbmogiid oaidnut. Dalle dat ipmirdit ahte mun lean Hearrá, cealká Hearrá Ipmil. 24 Mun vieččan din álbmogiid gaskkas, čohkken din buot eatnamiin ja buvttán din din iežadet eatnamii. 25 De mun riškkuhan buhtis čázi din badjelii, vai dii buhtásmuvvabehtet. Dii lehpet dahkan iežadet buhtismeahttumin buot eahpeipmilgovaideattetguin, muhto mun buhtistan din. 26 Mun attán din raddái ođđa váimmu ja deavddán din ođđa vuoiŋŋain. Mun válddán din rattis geađgeváimmu ja attán dan sadjái oažževáimmu. 27 Mun deavddán din iežan vuoiŋŋain ja oahpistan din jeagadit mu báhkkomiid ja doallat mu lágaid ja eallit daid mielde. 28 Dii oažžubehtet ássat dan eatnamis maid mun lean addán din áhčiide. Dalle dii lehpet mu álbmot, ja mun lean din Ipmil. 29 Mun gájun din buot din buhtismeahttunvuođas. Mun gohčun gortni šaddat ja dagan dan eatnagin, inge mun šat suova din gillát nealggi. 30 Mun divttán muoraid addit ollu šaddosiid ja bealdduid addit valljugas šattu, nu ahte dii ehpet šatta šat gillát eará álbmogiid hiddjádusa nealggi geažil. 31 Go dii dalle muitibehtet iežadet bahás vádjolusa ja buot vearrivuođa maid lehpet dahkan, de dii fasttášehpet iežadet suttuideattet ja fasttes daguideattet dihte. 32 Muitet ahte mun in daga din dihte dan maid dagan, cealká Hearrá Ipmil. Heahpanaddet ja heahpanehket vádjolusadet, israellaččat!
33 Ná cealká Hearrá Ipmil: Go mun lean buhtistan din buot din vearredaguin, de mun divttán olbmuid ássat gávpogiidda, ja viessobázahasat huksejuvvojit fas. 34 Ávdin eanan bargojuvvo, iige dat gii johtá doppe, oainne šat meahci. 35 Olbmot dadjet: “Dát eanan lei ávdin, muhto dál dat lea dego Edena gilvvagárdi. Gávpogat mat ledje čievračopman, heavahuvvon ja biliduvvon, leat dál nannejuvvon, ja olbmot ásset dain.” 36 Dalle din birasálbmogat, dat mat vel leat báhcán, ipmirdit ahte mun, Hearrá, lean huksen dan mii lei heavahuvvon, ja lean dahkan ávdin eatnama bargojuvvon eanamin. Mun, Hearrá, lean sárdnon, ja mun dagan dan.
37 Ná cealká Hearrá Ipmil: Velá dán mun dagan Israela álbmogii, go sii átnot dan mus: Mun divttán sin lassánit nugo sávzaeallu. 38 Nugo oaffarsávzzat devdet Jerusalema basiid áigge, nu olmmošealutge devdet heavahuvvon gávpogiid. Dalle sii ipmirdit ahte mun lean Hearrá.