Goikedávttit eallájit
1 Hearrá giehta bođii mu badjelii, ja Hearrá vuoigŋa doalvvui mu guhkás eret ja luittii mu gasku leagi gos ledje dievva dávttit. 2 Son divttii mu mannat daid badjel ovddos maŋos, ja mun oidnen ahte leagis ledje hui ollu dávttit ja ahte dat ledje áibbas goikásat. 3 Hearrá jearai mus: “Olmmoš, sáhttetgo dát dávttit eallát?” Mun vástidin: “Hearrá, mu Ipmil, dušše don dieđát dan.” 4 Son celkkii munnje: “Profehtastala dáidda dávttiide ja daja: Goikedávttit, gullet Hearrá sáni! 5 Ná cealká Hearrá Ipmil: Mun bijan didjiide vuoiŋŋa, nu ahte dii eallábehtet. 6 Mun bijan didjiide suonaid, šaddadan din birra oačči ja govččan din liikkiin, ja mun attán didjiide vuoiŋŋa, nu ahte dii eallábehtet. Dalle dii ipmirdehpet ahte mun lean Hearrá.”
7 Mun profehtastallen nugo ledjen gohččojuvvon. Go mun ledjen profehtastallamin, de gullui skálla go dávttit laktásedje nubbi nubbái. 8 Mun oidnen ahte daidda šadde suonat ja oažži ja daid govččai liiki, muhto vuoigŋa dain ii lean.
9 Hearrá celkkii munnje: “Profehtastala, olmmoš, profehtastala ja daja vuigŋii: Ná cealká Hearrá Ipmil: Boađe, vuoigŋa, njealji biekkas! Bosát dáid goddojuvvon olbmuide, vai dat eallájit!”
10 Mun profehtastallen nugo Hearrá gohčui mu, ja dávttiide bođii vuoigŋa. Dat eallájedje ja čuožžiledje, ja das lei hui stuorra olmmošeatnatvuohta.
11 Son celkkii munnje: “Olmmoš, dát dávttit leat Israela álbmot. Sii dadjet: Min dávttit leat goikan, min doaivu lea duššan, mii leat láhppon. 12 Dan dihte profehtastala ja daja sidjiide: Ná cealká Hearrá Ipmil: Álbmogan, mun rabastan din hávddiid, bajidan din dain ja doalvvun din Israela eatnamii. 13 Álbmogan, go mun rabastan din hávddiid ja bajidan din dain, de dalle dii ipmirdehpet ahte mun lean Hearrá. 14 Mun attán didjiide iežan vuoiŋŋa, nu ahte dii eallábehtet, ja mun divttán din ássat iežadet eatnamii. Dalle dii ipmirdehpet ahte mun, Hearrá, dagan dan maid lean lohpidan dahkat. Ná cealká Hearrá.”
Guokte soappi – Juda ja Israel
15 Munnje bođii dát Hearrá sátni: 16 Olmmoš, váldde muorrasoappi ja čále dasa: “Juda ja israellaččat, su lihtolaččat.” Váldde dasto nuppi soappi, Efraima soappi, ja čále dasa: “Josef ja buot israellaččat, su lihtolaččat.” 17 Bija soppiid miehtut, nu ahte dat du gieđas šaddet oktan soabbin. 18 Go du álbmoga olbmot bivdet du čilget maid don dainna oaivvildat, 19 de vástit sidjiide: Ná cealká Hearrá Ipmil: Mun válddán Josefa ja Israela čearddaid, su lihtolaččaid, soappi mii lea Efraima gieđas, ja bijan dan miehtut Juda soppiin, dagan daid iežan gieđas oktan soabbin. 20 Soppiid maidda leat čállán, don galggat doallat gieđas dainna lágiin ahte du álbmoga olbmot oidnet daid. 21 Daja dasto sidjiide: Ná cealká Hearrá Ipmil: Mun vieččan israellaččaid dain álbmogiin maid gaskii sii leat gártan mannat, mun čohkken sin juohke guovllus ja buvttán sin sin iežaset eatnamii. 22 Dán eatnamis, Israela váriin, mun dagan sin oktan álbmogin, ja sis buohkain lea okta gonagas. Sii eai leat šat guokte álbmoga, sii eai leat šat juohkásan guoktin riikan. 23 Sii eai šat daga iežaset buhtismeahttumin iežaset eahpeipmilgovaiguin ja fastivuođaiguin ja ollu rihkkumiiguin. Mun sihkun eret sin suttuid ja oskkáldasmeahttunvuođa, mun buhtistan sin. De sii leat mu álbmot, ja mun lean sin Ipmil. 24 Mu bálvaleaddji David lea sin gonagas, sis buohkain lea okta báimman. Sii doahttalit mu lágaid, dollet mu báhkkomiid ja ellet daid mielde. 25 Sii besset ássat dan eatnamii maid mun adden bálvaleaddjásan Jakobii, dan eatnamii gos din áhčit leat ássan. Sii ja sin mánát ja mánáidmánát besset ássat das agálaš áigái, ja mu bálvaleaddji David lea sin oaivámuš agálaččat. 26 Mun dagan singuin ráfilihtu, agálaš lihtu. Mun lasihan sin, ja mu bassibáiki lea agálaččat sin gaskkas. 27 Mu viessu lea sin luhtte, mun lean sin Ipmil, ja sii leat mu álbmot. 28 Dalle buot álbmogat ipmirdit ahte mun lean Hearrá. Mun basuhan Israela, ja mu bassibáiki lea agálaččat sin gaskkas.