Ukraina flaggRedder Bibelen liv i Ukraina?
Finn ut mer
Gå til forsiden

Hosea

4

Hearrá sivaha behtolaš álbmoga

1 Gullet Hearrá sániid, Israela álbmot!

Hearrás lea ášši eatnama ássiiguin,

dasgo eatnamis ii leat mihkkege

duohtavuođaid iige oskkáldasvuođaid,

iige oktage dovdda Ipmila.

2 Garut ja giellásat

ja sorbmemat ja suoládeamit

ja náittosrihkkumat levvet,

varradahku čuovvu varradagu.

3 Dan dihte eanan goldná,

ja buohkat guđet ásset das, sotnet,

nu maid eatnama eallit ja almmi lottit,

ja meara guolit jápmet.


4 Ii oktage oaččo sivahit

dahje ráŋgut nuppi.

Du, báhppa, mun sivahan.

5 Don jorralat beaivečuovggas,

ihkku jorrala profehta oktan duinna,

ja du eatni mun duššadan.

6 Mu álbmot duššá

danne go das váilu diehtu.

Don leat hilgon dieđu,

dan dihte mun hilggun du,

don it oaččo šat leat mu báhppan.

Don leat vajáldahttán Ipmilat lága,

danne mun vajáldahtán du mánáid.

7 Mađe eanebun báhpat leat šaddan,

dađe eambbo sii leat suddudan mu vuostá.

Mun jorgalan sin gudni heahpadin.

8 Mu álbmoga suddu lea sin biebmu,

sii áibbašit dan rihkkumiid.

9 Muhto dál geavvá álbmogii

nu mo báhppiige.

Mun ráŋggáštan sin sin vádjolusa dihte,

mávssahan sidjiide sin daguid.

10 Sii borret muhto eai gallán,

sin fuorrámeanut eai lasit álbmoga.

Ná sidjiide geavvá danne go

sii leat hilgon Hearrá

ja heaitán guldaleames su.

11 Viidni ja sáhppi

jierpmehuhttá mu álbmoga.

12 Sii jerret neavvaga

muorrabihtáineaset,

soappit addet sidjiide vástádusaid.

Furrošeami vuoigŋa čádjidahttá sin,

sii eai leat oskkáldasat Ipmilasaset.

13 Sii oaffaruššet várrečohkain,

dieváin sii cahkkehit oaffardola

áikkaid, poppeliid ja terebinttaid vuolde,

dasgo daid suoivvan lea buorre.

Nu din nieiddat furrošit

ja din manjit rihkkot náittosdili!

14 Mun in ráŋggáš din nieiddaid

go sii furrošit

inge din manjiid go sii rihkkot náittosdili.

Dasgo olbmát mannet doaresbeallái

fuorránissoniiguin

ja oaffaruššet ovttas tempelfuoráiguin.

Jierpmehis álbmot roahppána.

15 Vaikko don, Israel, furrošat,

de allos Juda dahko iežas dasa sivalažžan.

Allet mana Gilgalii,

allet vuolgge Bet-Avenii,

allet vuortno doppe:

“Nu duohta go Hearrá eallá!”

16 Israel verroša dego nággáris gussa.

Divttášiigo Hearrá dan dál guohtut

veaittalassii dego lábbát?

17 Efraim lea dahkan lihtu eahpeipmiliiguin

– dahkos nugo dáhttu!

18 Go sii leat geargan jugalmasain,

de sii mannet furrošit.

Sii ráhkistit heabuhemiid heahpada.

19 Riđđu dohppe sin soajáidisguin,

sin áltárat šaddet sidjiide heahpadin.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.