Álbmot ja oaivámuččat leat beahttán
1 Gullet dán, báhpat,
guldal, Israela álbmot!
Gonagasviessu, váldde vuhtii!
Dii buohkat dubmehallabehtet,
danin go dii lehpet šaddan giellan Mispai,
lebbejuvvon fierbmin Taborii,
2 čiekŋalis bivdoroggin Šittimii.
Mun bagadan din buohkaid!
3 Mun dovddan Efraima,
Israel ii leat čihkkojuvvon mu ovddas.
Dál Efraim furroša,
Israel dahká iežas buhtismeahttumin.
4 Sin dagut hehttejit sin
jorgaleames Ipmileaset lusa.
Sin siste lea furrošeami vuoigŋa,
eaige sii dovdda Hearrá.
5 Israela čeavli duođašta dan vuostá.
Israel ja Efraim jorralit suttuidasaset,
Judage jorrala oktan singuin.
6 Sávzzaideasetguin
ja vuovssáideasetguin
sii vulget ohcat Hearrá,
muhto eai gávnna su,
son lea gáidan eret.
7 Israel lea leamaš
oskkáldasmeahttun Hearrái,
dasgo sii leat riegádahttán luovosmánáid.
Dál mánočalbmebeaivi golaha sin
oktan sin opmodagain.
8 Bossot dorvve Gibeas,
čuojahehket trompehta Ramas!
Bajidehket soahtečuorvasa Bet-Avenis:
Mii vuolgit duinna, Benjamin!
9 Efraim heavahuvvo ráŋggáštusa beaivvi.
Israela čearddaide mun almmuhan
dan mii lea duohta.
10 Juda oaivámuččat leat
dego dat geat sirdet rádjegeđggiid.
Sin badjelii mun golggahan
moarrán dego čázi.
11 Efraim lea sordojuvvon,
vuoigatvuohta lea dulbmojuvvon
julggiid vuollái.
Son čuovvulii dušši.
12 Muhto mun lean Efraimii dego muohcu,
Juda álbmogii nugo guohcageapmi.
13 Go Efraim oinnii buohcuvuođas
ja Juda hávis,
de Efraim vulggii Assyriai,
bijai sáni stuorragonagassii.
Muhto son ii máhte dearvvašmahttit din
iige buoridit din hávi.
14 Mun lean dego ledjon Efraimii,
nugo beahtu Juda álbmogii.
Mun gaikkodan iežan sállaša
ja geasán dan eret,
iige oktage dan gájo.
15 Mun máhcan báikásan
dassážii go sii leat soabahan
rihkkumiiddiset.
De sii jorgalit mu beallái,
heađisteaset sii ohcet mu.