Bildad sárdnu nuppe háve
1 De šuahlaš Bildad sárdnugođii fas. Son dajai:
2 Goas don áiggut bidjat ráji sániidasat?
Jierpma, de mii sáhttit sártnodit!
3 Anátgo don min šibihin,
leatgo mii du čalmmiin doavkkit?
4 Du iežat moarri gaikkoda du.
Galggašiigo eanan šaddat ávdimin du dihte
ja bákti sirdásit sajistis?
5 Goittotge ipmilmeahttuma čuovga čáská,
su dola njuokčamat eai báitte.
6 Su goađi čuovga sevnnjoda,
su lámpá jáddá.
7 Su fámolaš lávkkit árrojit,
su iežas áigumušat njeidet su.
8 Su juolggit sorrojit fierbmái,
son gahččá bivdoroggái.
9 Su juolgi darvána gillii,
báddi doallá su gitta.
10 Fierbmi lea čihkkojuvvon eatnamii,
su bálgá alde lea giella.
11 Suorggahusat balddihit su
juohke guovllus,
dat doarridit su ja faŋuhit su julggiid.
12 Heavvu dáhttu njiellat su,
lihkohisvuohta čuožžu gárvvisin
su bálddas.
13 Dávda borrá su liikki,
jápmima vuosttašriegádeaddji
loaktá su lahtuid.
14 Son gaikojuvvo goađistis, iežas dorvvus,
ja dolvojuvvo balddáhusaid gonagasa lusa.
15 Su goahtái ássá ballu,
rišša botkkuhuvvo su ássanbáikki miehtá.
16 Vuollin eatnamis su ruohttasat goiket,
badjin su oavssit ástet.
17 Su muitu jávká eatnamis,
su namma ii šat beakke gáhtain ja šiljuin.
18 Son norddastuvvo
čuovgasis seavdnjadassii,
son áddjojuvvo eret eatnama alde.
19 Sutnje ii báze nálli
iige árbbolaš iežas álbmogii,
ii oktage báze eallit su vissui.
20 Dat geat ásset oarjin, soiget su oasi,
nuortan olbmát dohppehallet ballui.
21 Ná geavvá suttolačča ássansadjái,
dan olbmo vissui gii ii dovdda Ipmila.