Job vástida Bildadii
1 De Job sártnui:
2 Man guhká dii áigubehtet áŧestit mu,
cuovkut mu sániideattetguin?
3 Logi geardde dii lehpet hiddjidan mu,
ehpet heahpanatta deaddimis mu vuolás.
4 Jos mun duođaid livččen čádjidan,
de dat livččii mu iežan ášši.
5 Juos dii áigubehtet čeavlástallat
mu vuostá,
de čájehehket ahte mun
lean ánssášan dan heahpada!
6 Dihtet: Ipmil lea dahkan munnje veriid,
son lea bidjan fierpmis mu birra.
7 Mun čuorvvun: “Veahkaváldi!”
muhto in oaččo vástádusa,
mun bárggun, muhto vuoigatvuohta ii leat.
8 Son lea áidon gitta mu geainnu,
mun in beasa šat ovdan,
son lea bidjan mu bálgáide seavdnjatvuođa.
9 Son lea nuollan mus árvvu,
son lea váldán mu oaivvis gudnegierddu.
10 Son gaikkoda mu áibbas,
son rohtte mus doaivvu
dego muora eatnamis.
11 Son diktá moaris cahkiidit mu vuostá,
son atná mu vašálažžanis.
12 Su joavkkut fallehit oktanaga,
dat bahkkejit mu vuostá
ja birastahttet mu goađi.
13 Son lea gáidadan mus mu vieljaid,
mu oahpes olbmot leat šaddan
munnje áibbas amasin.
14 Mu lagamuččat ja oahppásat leat jávkan,
mu dálu olbmot leat vajáldahttán mu.
15 Mu bálvaleaddjinissonat amašit mu,
mun lean sin čalmmiin vierroolmmoš.
16 Jos mun rávkkan bálvaleaddján,
de son ii vástit,
ii vaikko mun ánun ja rohkadalan.
17 Mu vuoiŋŋahat lea bahča áhkkásan,
mu hádja lea guohca iežan olbmuide.
18 Velá mánátge futnot mu.
Go mun sárdnugoađán,
de sii leat njálbmumin.
19 Buot mu lagamus ustibat fasttášit mu,
datnai geaid mun ráhkistin,
jorgalit mu vuostá.
20 Mun lean dušše liiki ja dávttit,
illá mun birgehan iežan heakka.
21 Árkkálmastet mu, árkkálmastet,
dii geat lehpet mu ustibat,
dasgo Ipmila giehta lea guoskkahan mu.
22 Manne dii doarrádallabehtet mu,
dego Ipmil,
ehpetge gallán mu oaččis?
23 Vare mu sánit čállojuvvošedje muitui,
vare dat sárgojuvvošedje čálusin,
24 vare dat gohppojuvvošedje báktái
agibeaivái ruovderiffaliin ja lajuin!
25 Mun dieđán ahte mu lonisteaddji eallá,
ja loahpas son boahtá eatnama ala.
26 Go mu liiki lea duššan
ja mu oažži nohkan,
de mun beasan oaidnit Ipmila,
27 mun beasan geahččat su
iežan čalmmiiguin:
Son ii leat munnje vieris.
Ohcaleapmi loaktá mu siskkildasa!
28 Dii dadjabehtet:
“Mii áigut doarrádallat su,
son lea lihkuhisvuođa ruohtas.”
29 Ballet dalle miehkis,
dasgo moarri lea suddu
mii ráŋggáštuvvo jápmimiin.
Dihtet ahte duopmu lea.