Sofar sárdnu nuppe háve
1 De naamalaš Sofar sárdnugođii fas. Son dajai:
2 Mun lean nu hárbman
ahte ferten vástidit,
mu hirpmástupmi bágge mu dasa.
3 Mun šattan gullat
heahppášuhtti cuiggodusa,
muhto mu áddejupmi
addá munnje vástádusa.
4 Donhan dieđát: Dološ áiggiid rájes,
gitta dan rájes go olbmot
leat leamaš eatnama alde,
de sii leat diehtán
5 ahte ipmilmeahttumiid ávvu
lea oanehaš,
bahás olbmo illu bistá
dušše čalbmeravkalanbottu.
6 Vaikko son šattašii gitta almmi rádjái,
vaikko su oaivi guoskkašii balvvaide,
7 de son dattetge luottahuvvá
dego iežas baika.
Dat geat oidne su, jerret: “Gosa son šattai?”
8 Dego niehku son girdá eret iige leat šat,
son jávká dego idjaoainnáhus.
9 Dat geat oidne su, eai oainne su šat,
su ássansadji ii šat deaivvat suinna.
10 Su bártnit fertejit addit
buhtadusa heajuide,
su mánát šaddet máhcahit su riggodaga.
11 Vaikko su rupmaša dievva lei
nuorravuođa fápmu,
de dat biddjojuvvo suinna muldii.
12 Jos bahá njálggiida su njálbmái,
ja son čiehká dan njuokčamis vuollái,
13 seastá dan iige luoitte,
muhto doallá dan guomi vuostá,
14 de dat nuppástuvvá
go son lea dan njiellan,
dat šaddá gearbmašmirkon su čoavjjis.
15 Son ferte fas vuoksit
riggodaga maid njielai,
Ipmil vuojiha dan olggos su čoavjjis.
16 Gearbmašmirkko son njamai,
mirkogearbmaša njuovčča goddá su.
17 Son ii goassege beasa oaidnit jogaid,
ii eanuid main golgá honnet ja lákca.
18 Ii son beasa návddašit dan
maid lei fidnen,
su stuorra vuoittut eai šatta sutnje illun,
19 danin go son cuvkii heajuid
ja guđii sin veallát,
ja lea rievidan alccesis viesuid
maid earát leat huksen.
20 Go son anistumistis ii oaččo doarvái,
de son ii goassege veaje gádjut
dan mii sutnje lea mávssolaš.
21 Ii oktage vealtan su vuovdáivuođas,
danne su lihkku ii bistte.
22 Stuorra valljugasvuođastis
son šaddá baskkádassii,
lihkuhisvuohta deaivida su olles fámuin.
23 Son oažžu eambbo go doarvái:
Ipmil vuolggaha buolli moaris su vuostá
ja arvviha heavahusa su ala.
24 Jos son beassá báhtarit
ruovdevearjjuin,
de su ráigá bronsanjuolla.
25 Son geassá njuola sealggistis,
dan šealgu njuni sáhpperáhkustis,
ja son suorgana.
26 Sus lea aivve seavdnjadas vuordagis,
su loaktá dolla mii lea su várás
cahkkehuvvon.
Ii oktage su goađis beasa báhtarussii.
27 Albmi almmuha su rihkkosa,
eanan čuožžila su vuostá.
28 Eatnu doalvu su viesu,
dulvi doidá dan eret Ipmila moari beaivvi.
29 Dát lea ipmilmeahttuma oassi
maid son oažžu Ipmilis,
árbi maid Ipmil lea mearridan sutnje.