1 Mun lean dahkan lihtu
iežan čalmmiiguin:
In goassege geahča nieidda.
2 Mii livččii muđui mu oassi
almmi Ipmilis,
mu árbi Buotveagalaččas
guhte lea allagasas?
3 Lihkuhisvuohtahan deaivida
vearredahkki,
bahás oassi dan gii dahká baháid.
4 Almma Ipmil oaidná mu geainnuid,
almma son lohká buot mu lávkkiid?
5 Leango mun vádjolan behtolaččat,
leango leamaš gearggus beahttit?
6 Vihkkejehkos Ipmil mu
rievttes veavttain,
dalle son oaidná
ahte mun lean láitemeahttun.
7 Jos mu lávkkit leat spiehkastan bálgás,
jos mu čalmmit leat čádjidahttán
iežan váimmu,
jos suddu lea duolvvidan mu gieđaid,
8 de borros nubbi dan maid
mun lean gilván,
rohttejuvvojehkoset mu šattut eatnamis
oktan ruohttasiiguin!
9 Jos mun lean fillehallan
lagamužžan áhkkái,
jos lean njágadan su uvssa guoras,
10 de málejehkos mu áhkká
eará olbmá gortniid,
veallájehkos suinna gii ihkinassii.
11 Dat livččii fasttes dahku,
dakkár vearrivuohta
fertešii ráŋggáštuvvot.
12 Dat livččii dolla mii boaldá
ja heavaha,
dat billistivččii buot mii olbmos lea.
13 Leango mun badjelgeahččan
iežan šláva dahje šlávvanissona
vuoigatvuođa,
go sus lea leamaš nággu muinna?
14 Jos lean dahkan nu,
de maid dagašin dalle go Ipmil čuožžila,
maid dajašin go son bidjá mu vástidit?
15 Son gii eadnán goaŧus
attii munnje hámi,
hábmii maiddái mu bálvaleddjiid.
Mii leat ovttahat gieđa duojit.
16 Leango mun biehttalan
váivvášis veahki,
čáskadan čuovgga leaskka čalmmiin?
17 Leango mun borran láibán okto
inge leat juogadan dan oarbásiin?
18 In de leat, nuorravuođa rájes
mun lean biebman oarbásiid dego áhčči,
álggu rájes lean veahkehan leaskkaid.
19 Diktengo mun vártnuheami
leat biktasiid haga,
nu ahte váivvášis ii lean
mainna gokčat iežas?
20 Iigo son buressivdnidan mu,
go biktalii mu lábbáid ulluiguin?
21 Leango mun bajidan gieđa
oarbása vuostá
go dihten ahte vuoittán dikkis?
22 Jos lean dahkan dan,
de gahččos mu oalgi eret beađbbis,
mannos mu giehta eret lađđasis!
23 Dalle mun balašin
ahte Ipmil dagaha lihkuhisvuođa,
ahte in ceavzzáše su allatvuođa ovddas.
24 Leango mun dorvvastan gollái,
leango dadjan dasa:
“Dutnje mun luohtán”?
25 Leango mun illudan
danne go mu riggodat lea stuoris,
ja danne go lean oamastan nu ollu?
26 Leango geahččan beaivváža
go dat báitá,
dahje mánu go dat hearvásin
vádjola ovdan,
27 nu ahte mu váibmu čihkosis
fillehalai máidnut daid cummáiguin.
28 Dat livččii leamaš
vearredahku mii ráŋggáštuvvo,
dalle mun livččen biehttalan
Ipmila allagasas.
29 Mun in leat illudan
vašálažžan oasehisvuođas
inge ávvudan, go lihkuhisvuohta
deaividii su.
30 In leat goassege diktán
iežan njálmmi suddudit,
in leat garuhemiin sávvan
iežan vašálačča jápmit.
31 Mu dálu olbmot lávejedje dadjat:
“Mis ii leat goassege váilon
biergu su beavddis.”
32 Ii oktage vieris dárbbašan idjadit olgun,
mu uksa lei rabas mátkálažžii.
33 Mun in leat gokčan suttuidan
nugo máŋgasat dahket,
in leat čiehkan rihkkumiiddán
iežan ohcii.
34 Danin mun in bala olbmuin,
in suorgan fulkkiidan bilkku dihte,
in oro jávoheapmin iežan viesus.
35 Vare soamis guldalivččii mu!
Mun lean dadjan dan maid áigon.
Vare Buotveagalaš vástidivččii munnje!
Jos mu vuostálasti čálášii
áššáskuhttinčállaga,
36 de mun guottášin dan olggiid alde,
čanašin dan gudnegierdun
iežan oaivvi birra!
37 Mun vástidivččen juohke lávkkis,
lahkanivččen sutnje ráđđejeaddji láhkái.
38 Jos mu bealdu váidá mu
ja buot dan jorgunluottat čirrot,
39 jos mun almmá mávssu haga
lean loaktán dan šattu
ja ožžon dan šuohkkit,
40 de šaddoset das munnje
nisuid sadjái bastilislánját,
bivggiid sadjái árvvohis rásit!
Dása nohket Joba sánit.