1 Salomo sátneláskkut.
Jierpmálaš bárdni illudahttá áhčis,
jierpmehis bárdni lea eatnis moraš.
2 Vearálaš vuoitu ii ávkkut,
vuoigatlašvuohta gádju jápmimis.
3 Hearrá ii divtte vanhurskása nealgut,
ipmilmeahttuma anistumi son hilgu.
4 Láikkes gieđat dahket geafin,
viššalis gieđat buktet rikkisvuođa.
5 Jierpmálaš olmmoš čohkke geasset,
dat gii oađđá láddjenáigge,
šaddá heahpadii.
6 Vanhurskkis buressivdniduvvo
valljugasat,
ipmilmeahttuma njálmmis
lea veahkaváldi.
7 Vanhurskása muitu buressivdniduvvo,
ipmilmeahttuma namma guohcaga.
8 Viissis olmmoš váldá vára
cuiggodusain,
dasa gii hállá jallaid, geavvá funet.
9 Láitemeahttun vádjola oadjebassan,
dasa gii manná mohkkegeainnuid,
geavvá bahás.
10 Dat gii časkkaša čalmmiid, loavkida,
gii cuiggoda roahkkadit, dahká ráfi.
11 Vuoigatlaš olbmo njálbmi
lea eallima ája,
ipmilmeahttuma njálmmis
lea veahkaváldi.
12 Vašši boktá bealkkuid,
ráhkisvuohta gokčá
rihkkumiid eatnatvuođa.
13 Jierpmálačča baksamiin
boahtá viisodat,
jierpmehis olbmo sealggi cábmos soabbi!
14 Viisát vurkejit dieđu,
go duihmi sárdnu, de heavvu lea lahka.
15 Opmodat lea riggái nana ladni,
gefodat lea váivváša heavvu.
16 Vanhurskása bálká addá eallima,
dat maid ipmilmeahttun skáhppo,
doalvu suddui.
17 Dat gii dohkkeha bagadusa,
čujuha eallima geidnui,
dat gii badjelgeahččá cuiggodusa,
čádjidahttá.
18 Dat gii čiehká vaši, lea behtolaš,
jalla lea dat gii gilvá bahás ságaid.
19 Gos leat ollu sánit,
das ii váillo suddu,
jierpmálaš olmmoš
stivre iežas njuokčama.
20 Vanhurskása sárdnun lea válljusilba,
ipmilmeahttuma jurdagat
eai leat mange veara.
21 Vanhurskása sánit
oahpistit eatnagiid,
jallaid jierpmehisvuohta
doalvu sin jápmimii.
22 Hearrá buressivdnádus
dahká rikkisin,
váivválaš rahčan ii lasit dasa maidege.
23 Jalla hávskodat lea dahkat baháid,
jierpmálačča illu lea viissisvuohta.
24 Ipmilmeahttuma deaivida dat
mas son ballá,
vanhurskkis oažžu dan maid sávvá.
25 Go riđđu lea meaddel,
de ipmilmeahttun ii šat leat,
muhto vanhurskkis olmmoš ii lihkahuvvo.
26 Nugo ettet bániide
ja suovva čalmmiide,
nu lea láikkes olmmoš
daidda geat vuolggahit su.
27 Hearrá ballu lasiha eallinbeivviid,
ipmilmeahttuma jagit oatnánit.
28 Vanhurskásis lea illu vuordasis,
ipmilmeahttuma doaivu duššá.
29 Hearrá lea láitemeahttuma ladni,
muhto vearredahkkiid heavvu.
30 Vanhurskkis ii lihkahuvvo goassege,
ipmilmeahttun ii beasa eallit eatnamis.
31 Vanhurskása njálmmis
boahtá viisodat,
behtolačča njálbmi buđđojuvvo.
32 Vanhurskkis máhttá válljet
heivvolaš sániid,
ipmilmeahttuma sárdnun
lea aivve behtolašvuohta.