1 Vearreveavttaid Hearrá fasttáša,
ollesdettot vihkkenlottaide
son liiko.
2 Gos lea čeavli, dohko boahtá heahpat,
vuollegaččaid páras
lea viissisvuohta.
3 Vuoigatlaččaid oahpista
sin vuiges miella,
oskkáldasmeahttumiid duššada
sin behtolašvuohta.
4 Opmodat ii veahket moari beaivvi,
vanhurskkisvuohta gádju jápmimis.
5 Láitemeahttun olbmo
vanhurskkisvuohta
dahká su geainnu dássidin,
ipmilmeahttun duššá iežas bahávuhtii.
6 Vuoigatlaš olbmuid vanhurskkisvuohta
gádju sin,
behtolaččat darvánit iežaset himuide.
7 Go olmmái jápmá,
de su doaivu lea nohkan,
su fápmu ii šat atte doaivvu.
8 Vanhurskkis gáddjojuvvo áŧestusas,
ipmilmeahttun šaddá su sadjái.
9 Ipmilmeahttun vahágahttá
sániidisguin lagamuččas,
diehtu gádju vanhurskásiid.
10 Go vuoigatlaččaide geavvá bures,
de gávpot illuda,
go ipmilmeahttumat duššet,
de illu lea stuoris.
11 Vuoigatlaččaid buressivdnádusat
huksejit gávpoga,
ipmilmeahttumiid ságat duššadit dan.
12 Jierpmeheapme
badjelgeahččá lagamuččas,
jierpmálaš olmmái orru jávohaga.
13 Šoambás olmmoš
muitala čiegusvuođaid,
luohtehahtti olmmái čiehká ášši.
14 Go ii leat stivrejupmi,
de álbmot jorrala,
ráđđeaddiid eatnatvuohta
addá bestojumi.
15 Bahás geavvá dasa
gii dáhkida vierroolbmo,
dat gii biehttala addaleames gieđaid,
lea oadjebas.
16 Liekkus nisson oažžu gudni,
viššalis olmmái háhká riggodaga.
17 Buorredáhtolaš dahká buori alccesis,
dat gii lea goavvi, vahágahttá iežas.
18 Ipmilmeahttun fidne
behtolaš vuoittu,
dat gii gilvá vanhurskkisvuođa,
oažžu bistevaš bálkká.
19 Gii bissu vuoigatlažžan,
oažžu eallima.
Bahávuođa váinnuheapmi
doalvu jápmimii.
20 Hearrá fasttáša behtolaččaid,
muhto dat geat vádjolit láitemeahttumit,
leat su miela mielde.
21 Bahás olmmoš ii beasa goassege
ráŋggáškeahttá,
vanhurskásiid nálli gáddjojuvvo.
22 Dego golleriekkis spiinni njunis
lea čáppa nisson geas váilu jierbmi.
23 Vanhurskásiid hálidus buktá lihku,
ipmilmeahttumiid doaivu doalvu moarrái.
24 Muhtun lea árvvas
ja oažžu ain eambbo,
nubbi hánohallá ja dattetge gefo.
25 Árvvas olmmoš oažžu ieš valji,
dat gii galleha iežáid, gallehuvvo ieš.
26 Álbmot garuha dan
gii doallá gortni alddis,
dat gean gordni lea vuovdimassii,
buressivdniduvvo.
27 Dat gii ohcá buori,
gávdná lihku,
gii ohcá bahá, dasa dat boahtá.
28 Dat gii dorvvasta riggodahkasis,
gahččá,
vanhurskásat leat
dego rudnes lasttat.
29 Dat gii goarida iežas viesu,
árbe biekka,
jalla šaddá bálvalit viisá.
30 Vanhurskása šattus
lea eallima muorra,
veahkaváldi duššada eallima.
31 Vanhurskkis oažžu bálkkás
eatnama alde,
man sakka eambbo dalle
ipmilmeahttun ja suttolaš!