Sálbma 11
1 Koarrajođiheaddjái. Davida sálbma.
Hearrái mun dorvvastan.
Mo dii sáhttibehtet dadjat munnje:
“Báhtar várrái dego loddi!
2 Ipmilmeahttumat geldet dávggi,
njuolla lea juo gárvvisin,
seavdnjadin sii áigot báhčit dan
gean váibmu lea vuoigatlaš.
3 Go vuođđu gaikkoduvvo,
maid dalle vanhurskkis sáhttá dahkat?”
4 Hearrá lea bassi tempelisttis,
su truvdnu lea almmis.
Su čalmmit oidnet buot,
son guorahallá olbmuid
geahčastagainis.
5 Hearrá dutká vuoigatlaččaid
ja ipmilmeahttumiid.
Son vašuha daid geat ráhkistit
veahkaválddi.
6 Ipmilmeahttumiid ala
son arvviha
buolli hilaid ja riššaid,
boaldi báhkka biegga lea sin oassi.
7 Hearrá lea vanhurskkis,
son ráhkista vuoigatlaš daguid.
Vuoigatlaččat besset oaidnit
su muođuid.