Sálbma 10
1 Hearrá, manne leat nu guhkkin,
manne čiehkádat áŧestusa áigge?
2 Ipmilmeahttumat oaguhit
vártnuheami čeavllisteaset,
muhto darvánit iežaset juonaide.
3 Ipmilmeahttun rábmo
iežas vuovdás anistumi,
buressivdnida ruhtaváibmila
ja hiddjida Hearrá.
4 Ipmilmeahttun čevllohallá
ja jurddaša:
“Ii Ipmil ráŋggáš.
Ipmil ii oppa leatge.”
5 Son lihkostuvvá buot das maid dahká,
du duomut leat guhkkin eret sus.
Vašálaččainis son ii beroš.
6 Son dadjá váimmustis:
“Ii mihkkege lihkat mu,
lihkuhisvuohta ii deaivit mu.”
7 Su njálmmi dievva leat garrudusat,
behtolašvuohta ja veahkaváldi,
su njuovčča gokčá
vearrivuođa ja bahávuođa.
8 Son vuođgŋá dáluid lahkosiin,
čihkosis son goddá sivaheami.
Su čalmmit vákšot vigiheami,
9 son šokčá čihkosis dego ledjon rođus.
Son šokčá vártnuheami,
dohppe su ja sorrá su fierbmásis.
10 Son njahkala vuođgŋit,
vártnuheapme vuollána su fápmui.
11 Son dadjá váimmustis:
“Ii Ipmil beroš.
Son lea gokčan muođuidis,
ii son oainne maidege.”
12 Hearrá, čuožžil! Ipmil,
lokte gieđa,
ale vajáldahte vártnuhemiid!
13 Manne ipmilmeahttumat
ožžot hiddjidit Ipmila
ja dadjat váimmusteaset:
“Ii son ráŋggáš”?
14 Don oainnát heađi ja morraša
don oainnát buot ja anát fuola.
Vártnuheapme bidjá áššis
du ovdii,
donhan leat oarbása
veahkeheaddji.
15 Doaje ipmilmeahttun
ja bahás olbmo fámu,
ozahala su bahávuođa,
vai dat ii leat šat.
16 Hearrá lea gonagas agálašvuhtii,
vieris álbmogat leat jávkaduvvon
su eatnamis.
17 Hearrá, don gulat
váivvášiid átnumušaid,
don guldalat sin
ja nannet sin váimmu.
18 Don veahkehat oarbásiid
ja sordojuvvon olbmuid
oažžut vuoigatvuođa,
vai ii oktage šat dárbbaš
báhtarit eatnamis balus.