Sálbma 144
1 Davida sálbma.
Máidnojuvvon lehkos Hearrá, mu bákti!
Son oahpaha mu gieđaid soahtat,
mu suorpmaid dáistalit.
2 Hearrá lea mu árpmiheaddji ja ladni,
son lea mu toardna ja beasti,
son lea mu galba ja dorvu.
Son bidjá álbmogiid mu váldái.
3 Hearrá, mii lea olmmoš,
go don anát sus fuola,
olbmománná, go don beroštat sus?
4 Olmmoš lea dego hieibma,
su beaivvit jávket nugo suoivvan.
5 Hearrá, sojat almmát ja njieja vuolás,
guoskkat váriid, vai dat borggistit!
6 Divtte álddagasaid šleađgut,
biđge vašálaččaidat,
báže njuolaidat ja moivašuhte sin!
7 Geige gieđa allagasas ja gájo mu,
beastte mu čiekŋalis čáziin!
Gájo mu vierrásiid gieđas.
8 Sin njálbmi sárdnu giellásiid,
sii bajidit olgeš gieđa ja vurdnot vearreváli.
9 Ipmil, mun lávllun dutnje ođđa lávlaga,
mun čuojahan dutnje logisuonat hárppain.
10 Don gii attát vuoittu gonagasaide,
don beasttát bálvaleaddját Davida
bahás miehkis.
11 Gájo mu vierrásiid gieđas.
Sin njálbmi sárdnu giellásiid,
sii bajidit olgeš gieđa ja vurdnot vearreváli.
12 Min bártnit leat juo nuorran
dego allagin šaddan šattut,
min nieiddat dego báccit,
šloahta hearvan duddjojuvvon.
13 Min vuorkkát leat dievva,
dain lea valjis borramuš.
Min sávzzat lassánit duhátgeardásaččat,
velá logiduhátgeardásaččat min gittiin,
14 ja min gusat leat buoiddit.
Ii oktage fallet min, ii oktage áje min eret,
eai gullo váidalančuorvasat min gáhtain.
15 Lihkolaš dat álbmot masa geavvá ná,
lihkolaš dat álbmot man Ipmil lea Hearrá!