Sálbma 145
1 Davida máidnunlávlla.
Mun alidan du, mu Ipmil ja gonagas,
mun buressivdnidan du nama
álo ja agálaš áigái.
2 Juohke beaivvi mun giittán du,
mun máinnun du nama álo ja agálaš áigái.
3 Stuoris lea Hearrá, sakka rámiduvvon,
guorahallameahttun su stuorisvuohta.
4 Buolva buolvva maŋis máidnu du daguid
ja muitala du veagalaš daguid.
5 Sii gulahit du hearvásvuođa
ja du stuorra gudni.
Mun guorahalan du oavdudaguid.
6 Sii sárdnot man hirpmus du fápmu lea,
mun gulahan du stuorisvuođa.
7 Sii beakkuhit du stuorra buorrevuođa,
ja lávlot ávuin du vanhurskkisvuođa.
8 Árbmugas ja váibmoláđis lea Hearrá,
son lea gierdavaš,
ja su buorrevuohta lea stuoris.
9 Hearrá lea buorre buohkaide,
váibmoláđis buot sivdnádusaidasas.
10 Hearrá, rámidehkoset du
buot du sivdnádusat,
máidnoset du du oskkáldas bálvaleaddjit.
11 Sii gulahit du riikka gudni,
sii muitalit du stuorra fámu birra,
12 vai buot olbmot dovddiidit du fámu
ja du riikka gudni ja hearvásvuođa.
13 Du riika bissu agálaš áigái,
du hearrávuohta buolvvas bulvii.
Hearrá sátni lea álo luohtehahtti,
son lea oskkáldas buot daguinis.
14 Hearrá doarjala daid geat jorralit,
son čuoččáldahttá
buot hearddohuvvan olbmuid.
15 Buohkaid čalmmit gehččet dutnje,
ja don attát sidjiide borramuša rivttes áigái.
16 Don rabastat gieđa ja gallehat
buot heakkalaččaid buorrevuođainat.
17 Hearrá lea vuoigatlaš,
son lea oskkáldas buot das maid dahká.
18 Hearrá lea lahka dan gii čuorvu su,
dan gii duohtavuođas jorgala su beallái.
19 Son ollašuhttá daid olbmuid sávaldagaid
geat ballet sus,
son gullá sin čuorvasa ja beastá sin.
20 Hearrá várjala daid geat ráhkistit su,
muhto ipmilmeahttumiid son duššada.
21 Rámidehkos mu njálbmi Hearrá,
máidnos buot mii eallá
su bassi nama álo ja agálaččat!