Sálbma 24
1 Davida sálbma.
Eanan ja buot mii dan deavdá,
gullá Hearrái,
máilbmi ja dat geat ásset das,
leat su.
2 Son lea vuođđudan
eatnama meara ala,
ceggen dan rávnnjiid badjelii.
3 Gii oažžu mannat Hearrá várrái,
gii beassá čuožžut su bassibáikkis?
4 Dat geas leat vigihis gieđat
ja buhtis váibmu,
gii ii váinnut behtolašvuođa
iige vuortno vearrut.
5 Sutnje Hearrá addá
buressivdnádusa,
bestojumi Ipmil
atná su vanhurskkisin.
6 Dát lea dat álbmot mii ohcá du,
mii boahtá du muođuid ovdii,
Jakoba Ipmil. Sela
7 Bajidehket oaivvi, poarttat,
badjánehket, agálaš uvssat,
vai gudni gonagas boahtá sisa!
8 Gii lea gudni gonagas?
Son lea Hearrá, gievra ja veagalaš,
Hearrá, veagalaš soahtat.
9 Bajidehket oaivvi, poarttat,
badjánehket, agálaš uvssat,
vai gudni gonagas boahtá sisa!
10 Gii lea gudni gonagas?
Son lea Hearrá, Almmiveagaid Ipmil.
Son lea gudni gonagas. Sela