Sálbma 25
1 Davida sálbma.
Dutnje, Hearrá, mun bijan doaivvu,
2 dutnje mun dorvvastan, Ipmilan.
Ale divtte mu šaddat heahpadii,
ale suova mu vašálaččaid
vuoitit mu ja beassat ávvudit.
3 Dat geat vurdet du,
eai heahppášuva goassege,
muhto behtolaččat šaddet heahpanit
ja báhcet guoros gieđaid.
4 Hearrá, čájet munnje
geainnuidat,
oahpat mu vádjolit bálgáidat.
5 Láide mu duohtavuođastat,
oahpat mu, Ipmil,
dasgo don leat mu beasti.
Mun vuorddán du álelassii.
6 Hearrá, muitte váibmoláđisvuođat,
čájet iežat agálaš buorrevuođa.
7 Ale muitte mu nuorravuođa
suttuid, ale bahás daguidan!
Don gii leat oskkáldas ja buorre,
ale vajálduhte mu!
8 Hearrá lea buorre ja vuoigatlaš,
danne son oahpaha
suttolaččaide iežas geainnu.
9 Son oahpista vuollegaččaid
vádjolit riekta,
son máhttáha vuollegaččaide
iežas geainnu.
10 Buot Hearrá bálgát leat buorit,
son lea oskkáldas
daidda geat dollet su lihtu
ja báhkkomiid.
11 Hearrá, atte munnje
ándagassii mu stuorra suttu
iežat nama gudnin.
12 Juohkehaš gii ballá Hearrás,
oahppá válljet rivttes geainnu.
13 Son beassá eallit ráfis,
ja su nálli árbe eatnama.
14 Hearrá atná ustitlaš searvevuođa
daiguin geat ballet sus,
su lihttu oahpista sin.
15 Mu čalmmit gehččet álo Hearrái,
son gálgá mu julggiid fierpmis.
16 Jorgal mu beallái
ja leage munnje árbmugas,
dasgo mun lean okto
ja vártnuheapme.
17 Čoavdde mu das
mii deaddá mu váimmu,
váldde eret mu áŧestusaid.
18 Geahča mu heađi ja váivvi,
ja atte ándagassii
buot mu suttuid.
19 Geahča, man eatnat
mus leat vašálaččat!
Sii vašuhit mu mearihis vašiin.
20 Várjal mu heakka ja beastte mu,
ale divtte mu šaddat heahpanit,
munhan dorvvastan dutnje.
21 Divtte láitemeahttunvuođa
ja vuoigatlašvuođa várjalit mu,
dasgo mun vuorddán du.
22 Ipmil, lonis Israela buot áŧestusain!