Sálbma 28
1 Davida sálbma.
Hearrá, mun čuorvvun du.
Mu bákti, ale leage jávohaga.
Jos don it vástit,
de mun šattan daid láhkásažžan
geat leat mannan hávdái.
2 Gula mu njuoras rohkosa
go mun čuorvvun dutnje
ja lokten gieđaid du tempela
basimus boaššu guvlui.
3 Ale gaikkit mu eret
oktanaga ipmilmeahttumiiguin,
daiguin geat dahket veriid.
Sii sárdnot ustitlaččat
lagamužžaseaset,
muhto sin váimmus lea bahávuohta.
4 Mávssat sidjiide sin daguid,
buot bahávuođa maid sii leat dahkan.
Atte sin daguid čuohcit
sidjiide alcceseaset,
divtte sin deaivvahaddat
iežaset daguide.
5 Siihan eai dovdda Hearrá daguid,
eai dan maid su gieđat leat dahkan.
Son gaikkoda sin,
son ii šat sin hukse.
6 Máidnojuvvon lehkos Hearrá,
dasgo son lea gullan
mu njuoras rohkadusaid.
7 Hearrá lea mu gievravuohta
ja mu galba,
mu váibmu dorvvasta sutnje.
Mun ožžon veahki,
ja mu váibmu ávvuda,
mun rámidan su lávlagiinnán.
8 Hearrá lea álbmogis givrodat,
iežas vuidojuvvon gonagasa
suodji ja bestojupmi.
9 Beastte álbmogat
ja buressivdnit iežat opmodaga.
Leage sin báimman,
guotte sin agálaš áigái.