Sálbma 29
1 Davida sálbma.
Gudnejahttet Hearrá,
ipmiliid bártnit,
addet Hearrái gudni ja fámu!
2 Gudnejahttet Hearrá nama,
luoitádehket Hearrá muođuid ovdii
bassi čikŋabiktasat gárvun!
3 Hearrá jietna čáziid badjel!
Gudni Ipmil čeargu,
Hearrá čeargu stuorra čáziid badjel.
4 Hearrá jietna lea fámolaš,
Hearrá jietna lea hearvái.
5 Hearrá jietna cuvke sederiid,
Hearrá ludde
Libanona sedermuoraid.
6 Son bidjá Libanona
njuikkodit dego gálbbi,
Sirjonvári dego meahcivuovssá.
7 Hearrá jietna časká
dollanjuokčamiid,
8 su jietna doarggistahttá meahci,
son bidjá Kadešmeahci doarggistit.
9 Hearrá jietna bidjá áldduid guoddit,
dat gaiku vuovddi báljisin.
Buot su tempelis čuorvu: “Gudni!”
10 Hearrá truvdnu lea almmiábi alde,
son ráđđe gonagassan agálašvuhtii.
11 Hearrá addá álbmogasas fámu,
Hearrá buressivdnida
iežas álbmoga ráfiin.