Sálbma 46
1 Koarrajođiheaddjái. Korahlaččaid sálbma. “Alamota” mielde.
2 Ipmil lea min dorvu
ja gievravuohta,
min veahkki buot áŧestusain.
3 Danne mii eat bala
vaikko eanan doarggistivččii,
vaikko várit lihkastivčče
meara čiekŋalasas,
4 vaikko bárut šávašedje
ja máraidivčče,
vaikko várit doarggistivčče
boršu mearas. Sela
5 Eatnu ja dan jogažat
illudahttet Ipmila gávpoga,
Alimusa bassi ássansaji.
6 Ipmil lea gasku dan gávpoga,
gávpot ii lihkas.
Ipmil veahkeha dan
go iđedisguovssu badjána.
7 Álbmogat máraidit,
riikkat suibbodit,
eanan doarggista
go son diktá jienas jupmat.
8 Hearrá, Almmiveagaid Ipmil,
lea minguin,
Jakoba Ipmil lea
min nana ladni. Sela
9 Bohtet geahččat maid
Hearrá lea dahkan,
su balddihahtti daguid
eatnama alde.
10 Son loahpaha sođiid oppa máilmmis,
son doadjá dávggiid,
cuvke sáittiid ja buolláha galbbaid.
11 “Bisánehket ja dovddiidehket
ahte mun lean Ipmil,
alit go buot álbmogat,
alimus eatnama alde.”
12 Hearrá, Almmiveagaid Ipmil,
lea minguin,
Jakoba Ipmil lea
min nana ladni. Sela