Sálbma 47
1 Koarrajođiheaddjái. Korahlaččaid sálbma.
2 Spežžot gieđaid, buot álbmogat,
bajidehket ávvučuorvasa Ipmilii!
3 Hirbmatlaš lea Hearrá, Alimus,
oppa máilmmi stuorra gonagas.
4 Son vuolida álbmogiid min váldái,
čearddaid min julggiid vuollái.
5 Son vállje midjiide árbeeatnama,
rápmin Jakobii
gean son ráhkista. Sela
6 Ipmil manná truvdnosis,
ávvučuorvasat skádjet,
dorvvet čudjet.
7 Lávlot ja čuojahehket Ipmila gudnin,
lávlot ja čuojahehket min gonagassii!
8 Ipmil lea oppa máilmmi gonagas.
Lávlot sutnje lávlaga!
9 Ipmil lea álbmogiid gonagas,
son čohkká bassi truvnnustis.
10 Álbmogiid oaivámuččat
čoagganit ovttas
Abrahama Ipmila álbmogiin,
dasgo eatnama veagalaččat gullet Ipmilii.
Son lea buot alimus.