Sálbma 9
1 Koarrajođiheaddjái. “Mut labbena” mielde. Davida sálbma.
2 Hearrá, mun giittán du
oppa váimmustan,
muitalan buot du oavdudaguid.
3 Mun illudan ja ávvudan du siste,
mun máinnun du nama, don Alimus.
4 Mu vašálaččat geassádedje,
sii jorraledje ja dušše
du muođuid ovdii.
5 Duođaid, don leat dubmen
ja addán munnje vuoigatvuođa,
don, vuoigatlaš duopmár,
leat čohkánan truvdnosat.
6 Don ráŋgot álbmogiid
ja duššadit ipmilmeahttumiid,
don sihkkot sin nama
agálaččat ja álelassii.
7 Vašálaš lea cuvkejuvvon
ja duššaduvvon agibeaivái,
sin gávpogiid don leat njeaidán,
iige sis leat báhcán oppa muituge.
8 Hearrá ráđđe agálaš áigái,
duomu várás son lea ceggen truvnnus.
9 Son dubme máilmmi vanhurskásit,
cealká vuoigatlaš duomu álbmogiidda.
10 Hearrá lea sordojuvvon
olbmuid ladni,
ladni áŧestusa áiggiid.
11 Dutnje dorvvastit buohkat
geat dovdet du nama,
dasgo don, Hearrá,
it beahte sin geat ohcet du.
12 Lávlot máidnuma Hearrái
gii ássá Sionis,
almmuhehket su stuorra daguid
álbmogiidda!
13 Son gii mávssaha vara, muitá,
ii son vajáldahte vártnuhemiid
bárguma.
14 Leage munnje árbmugas, Hearrá,
geahča gillámuša
maid vašálaš lea dagahan munnje.
Don bajidat mu eret
jápmima poarttain,
15 vai mun beasan máidnut du
rámáduslávlagiiguin
ja ávvudit du bestojumi
Siona poarttain.
16 Álbmogat vudjo roggái
maid ieža ledje goivon,
sin juolggit sorrojedje fierbmái
maid sii ieža ledje gokčan.
17 Hearrá almmustuvai
ja doalai duomu,
ipmilmeahttumat darvánedje
iežaset gieđaid daguide. Higgajon. Sela
18 Jábmiidáibmui
mannet ipmilmeahttumat,
buot álbmogat mat vajáldahttet Ipmila.
19 Muhto váivvášat eai vajálduva
agálaččat,
vártnuhemiid doaivu ii dušša
agálaš áigái.
20 Čuožžil, Hearrá!
Ale suova olbmuid oažžut fámu,
dubme álbmogiid muođuidat ovddas.
21 Hearrá, surget álbmogiid,
vai sii ipmirdit
ahte sii leat dušše olbmot. Sela