Vuosttaš Muitalusaid girji

Báhpaid juhkosat

¹ Maiddái Arona nálli juohkásii juhkosiidda. Arona bártnit ledje Nadab, Abihu, Elasar ja Itamar. ² Nadab ja Abihu jámiiga ovdal áhčiska. Go dan guoktás eai lean bártnit, de dušše Elasar ja Itamar bálvaleigga báhppan. ³ David jugii juhkosiidda bálvalusvuoruid várás Arona náli ovttas Elasara soga Sadokiin ja Itamara soga Ahimelekiin. ⁴ Go gávnnahuvvui ahte Elasara nális ledje eambbo olbmát go Itamara sogas, de dat juhkkojuvvojedje nu ahte Elasara nális bohte guhttanuppelohkái sohkaoaivámučča ja Itamara nálisgis gávcci sohkaoaivámučča. ⁵ Juohku dahkkojuvvui vuorbádemiin, danin go sihke Elasara ja Itamara nális ledje bassibáikki oaivámuččat ja ipmilbálvalusa jođiheaddjit. ⁶ Levilaš čálli Šemaja, Netanela bárdni, čálii sin namaid girjái gonagasa, oaivámuččaid, báhppa Sadoka ja Ahimeleka, Ebjatara bártni, oaidnut, ja báhpaid ja levilaččaid sohkaoaivámuččaid oaidnut. Vuorbádemiin válljejuvvui ain vurrolagaid okta sohka Elasara nális ja okta Itamara nális.

⁷ Vuosttaš vuorbi bođii Jojaribii, nubbi Jedajai, ⁸ goalmmát Harimii, njealját Seorimii, ⁹ viđát Malkiai, guđát Mijaminii, ¹⁰ čihččet Hakkosii, gávccát Abiai, ¹¹ ovccát Ješuai, logát Šekanjai, ¹² oktanuppelogát Eljašibii, guoktenuppelogát Jakimii, ¹³ golbmanuppelogát Huppai, njealljenuppelogát Ješebabii, ¹⁴ vihttanuppelogát Bilgai, guhttanuppelogát Immerii, ¹⁵ čiežanuppelogát Hesirii, gávccinuppelogát Happissesii, ¹⁶ ovccinuppelogát Petahjai, guoktelogát Esekielii, ¹⁷ guoktelogivuosttaš Jakinii, guokteloginubbi Gamulii, ¹⁸ guoktelogigoalmmát Delajai ja guokteloginjealját Maasjai. ¹⁹ Dán ortnegis sii galge guhtege vuorustis mannat dahkat bálvalusa Hearrá tempelii, nugo sin lei gohččon sin áhčči Aron, gii ieš lei ožžon dan gohččuma Hearrás, Israela Ipmilis.

Eará levilaččat

²⁰ Eará levilaččat ledje dát: Amrama sogas Šubael, Šubaela sogas Jehdeja, ²¹ Rehabja sogas Jiššia, oaivámuš, ²² Jishara sogas Šelomot ja Šelomota sogas Jahat. ²³ Hebrona bártnit ledje Jeria, oaivámuš, nubbi Amarja, goalmmát Jahasiel ja njealját Jekamam. ²⁴ Ussiela bárdni lei Mika, Mika bárdni lei Šamir. ²⁵ Mika viellja lei Jiššia, Jiššia bárdni lei Sakarja. ²⁶ Merari bártnit ledje Mahli ja Muši, ja maiddái Jaasia lei su bárdni. ²⁷ Merari bártni Jaasia bártnit ledje Šoham, Sakkur ja Ibri. ²⁸ Mahli bártnit ledje Elasar geas alddis eai lean bártnit, ²⁹ ja Kiš. Kiša bárdni lei Jerahmeel, ³⁰ Muši bártnit ledje Mahli, Eder ja Jerimot. Dát ledje levilaččat, sogaid mielde logahallojuvvon. ³¹ Vieljaideaset Arona bártniid láhkái siinai – ovddimus sogas heajumussii – vuorbádedje gonagas Davida, Sadoka ja Ahimeleka ja báhpaid ja levilaččaid sohkaoaivámuččaid oaidnut.