Jieleden baakoe
1 Håalobe dam mij aalkovistie lij, dam maam libie govleme jïh jïjtjh vuajneme, dam maam vuartasjamme jïh gïetigujmie damteme: dam jieleden baakoem. 2 Jïh jielede vååjni, jïh dam vööjnimh. Dan bïjre vïhnesjibie jïh dijjese soptsestibie – ihkuve jielemen bïjre mij Aehtjien luvnie lij jïh mij mijjese vååjnedi. 3 Dam maam vuajneme jïh govleme, dijjese soptsestibie guktie dijjieh aaj mijjine edtjede årrodh, mijjieh gïeh Aehtjine jïh altese baernine, Jeesus Kristusinie aktesne libie. 4 Dam tjaelebe guktie dijjen aavoe ellies sjædta.
Tjoevkesne vaedtsedh
5 Saerniem libie Jeesusistie govleme jïh daelie dijjese håalobe: Jupmele tjoevke, jïh dan luvnie ij leah mij jemhkelde. 6 Gosse jiehtebe Jupmielinie libie jïh jemhkielisnie vaedtsebe, dellie slognestibie jïh ibie saetniesvoetesne leah. 7 Jupmele tjoevke jïh gosse tjoevkesne vaedtsebe, dellie aktesne libie jïh Jeesusen, Jupmelen Baernien vïrre mijjem gaajhkijste sådtojste reejnie. 8 Jis jiehtebe ij mijjen naan sådtoe, dellie jïjtjemem biehtebe, jïh ij mijjen naan saetniesvoete. 9 Gosse mijjen sådtojde boejhkesjibie, dellie Jupmele stynkehke jïh rïektesvoetesne guktie mijjen sådtojde luajhta jïh mijjem reejnie gaajhkijste mah eah staaran leah. 10 Jis jiehtebe eah mijjen naan sådtoeh, dellie Jupmelem slognestæjjine darjobe jïh altese baakoe ij leah mijjen luvnie.