Gyjhtelassh soelkehtassen åvteste
3 Bueriesjugniedassh Jupmielasse, mijjen Åejvien Jeesus Kristusen Aahtjan, åårmegs Aahtjan jïh Jupmielasse gie gaajhkh soelkehtassh vadta! 4 Gaajhkene mijjen neavrosne mijjem soelkehte guktie maehtebe dejtie soelkehtidh gïeh neavrosne dejnie soelkehtassine maam mijjieh jïjtjh Jupmielistie åadtjobe. 5 Gosse mijjieh veljiem Kristusen vaejvijste åådtjeme, dellie Kristusinie veljiem soelkehtassijste aaj åadtjobe. 6 Jis mijjieh vaejviedibie, dellie dijjieh soelkehtassem jïh gorredimmiem åadtjode. Jis mijjieh soelkehtovvebe, dellie dijjieh soelkehtovvede guktie vaejvide gaarsjelidie mejtie mijjieh tjoerebe gaarsjelidh. 7 Mijjen håhkoe dijjen gaavhtan stynkehke lea. Juktie daejrebe gosse dijjieh vaejvien åesiem åadtjode, edtjede soelkehtimmien åesiem aaj åadtjodh.
8 Mijjieh sïjhtebe dijjieh åerpenh edtjede daejredh mijjen neavroen bïjre Asiasne. Idtjimh neavroem gaarsjelh, idtjimh vuejnieh guktie meehtimh hïegkem gorredidh. 9 Ussjedimh mijjieh jaemiemasse dööpmesovveme. Edtjimh Jupmielasse leajhtadidh, jïh idtjimh galkh jïjtjemidie leajhtadidh, mohte Jupmielasse gie jeemegh jaemiedistie lutnjeste. 10 Jupmele mijjem jaemiedistie gorredi, jïh galka vihth mijjem gorredidh. 11 Dijjieh aaj tjoerede mijjem viehkiehtidh gosse mijjen gaavhtan rohkelidie. Gosse jïjnjh almetjh rohkelieh, dellie gyjhtelassh åårmegs viehkien åvteste maam mijjieh åadtjobe, bæjjese jïjnji njaelmijste berkiestieh.
16 Dijjem sïjhtim gåassodh gosse edtjim Makedoniase fealadidh jïh gosse bååstide edtjim vuelkedh. Dellie dijjieh meehtidh mannem reejrehtidh gosse edtjim Judejese vuelkedh. 17 Numhtie hov ussjedim. Mejtie manne eajparostim? Mejtie manne rååresjim guktie almetjh rååresjedtieh guktie maehtieh seamma aejkien jaavoe jïh ijje jiehtedh. 18 Juktie Jupmele gaerhteles lea, ibie dijjese seamma aejkien jaavoe jïh ijje jiehtieh. 19 Juktie Jupmelen Baernie, Jeesus Kristuse, gïen bïjre manne, Silvanus jïh Timoteos dijjen luvnie såårneme, ij lij jaavoe jïh ijje seamma aejkien; Jeesusinie ajve jaavoe. 20 Juktie Jeesusinie gaajhkh Jupmelen dååjvehtassh jaavoe-vaestiedimmiem åådtjeme. Dan gielhtie mijjieh aaj Jeesusinie jiehtebe aamen Jupmelen earose. 21 Jupmele mijjem jïh dijjem stinkede Kristusasse jaehkedh, jïh mijjem bådtjadamme. 22 Jupmele jïjtse mïerhkem mijjese bïejeme jïh Voejkenem vadteme tjirkeminie mijjen vaajmojde.