Dååjvehtasse Aejlies Voejkenen bïjre
1 Laevie Teofilos, mov voestes gærjesne tjeelim gaajhkem maam Jeesuse darjoeji jïh ööhpehti 2 dan beajjan gosse elmierïjhkese vöölki, jïh mænngan gosse Aejlies Voejkeninie jïjtse syjhtehtassem vuesiehtamme dejtie mejtie apostelinie veeljeme. 3 Dej uvte tjåadtjoeji gosse sealadamme jïh gellie åavtoejgujmie vuesiehti satne jielieminie, dellie goh njieljieluhkie biejjieh dej luvnie lij jïh Jupmelen rïjhken bïjre soptsesti. 4 Maalestahken gosse dejgujmie aktesne, dellie dejtie jeahta: «Aellede Jerusalemem laehpieh, vuertede dam maam Aehtjie dåajvoehtamme, dam maam dijjieh govleme manne soptsestamme. 5 Jåhha tjaetsine laavkoeji. Gosse naan biejjieh vaaseme, dellie edtjede Aejlies Voejkeninie lååvkesovvedh.»
Kristusen elmierïjhkevualkoe
6 Gosse aktesne lin, Jeesusem gihtjin: «Åejvie, gåessie sïjhth Jisraelen rïjhkem vihth tseegkedh?» 7 Dellie vaestede: «Idie åadtjoeh daejredh gåessie. Elmierïjhken Aehtjie dam jïjtse faamojne eajhnadovveme. 8 Faamoem badth åadtjode gosse Aejlies Voejkene dijjese båata, jïh dijjieh galkede mov bïjre Jerusalemesne vïhnesjidh jïh abpe Judejesne, Samariasne dovne eatnemen olkemes raadtan.» 9 Gosse daam jeahteme, vööjnin guktie lutnjesovvi jïh balve altemse tjïeki. 10 Gosse bæjjese goevleminie gogkoe gaatoeji, dellie göökte ålmah veelkes vaarjoejgujmie dej baalte. 11 Dah jeehtigan: «Galilejan almetjh, mannasinie vuartasjidie bæjjese alman? Jeesuse gie dijjeste bæjjese alman vaaltasovvi, bååstide båata seammalaakan guktie vööjnidh vöölki.»
12 Jïh dellie bååstide Jerusalemese mïnnin dan båvnen luvhtie man nomme Åljabåvne, sabbaate-geajnoem gåhkoe debpede. 13 Jïh gosse dahkoe böötin, dellie bæjjese laptese vaarrin gusnie Pïehtere, Jåhha, Jaahke, Andreas, Filippos jïh Tåamma, Bar-Tolomaios jïh Meehte, Alfaiosen elkie Jaahke, selote Simon jïh Jaahken elkie Judas. 14 Dah iktesth aktesne rohkelin. Desnie aaj naan nyjsenæjjah, Maarja, Jeesusen tjidtjie jïh altese vïellh.