1 Kle av deg, Jerusalem, di drakt av sorg og ulukke,
og kle deg for evig tid i strålande herlegdom frå Gud.
2 Sveip om deg kappa av rettferd frå Gud,
ta på deg hovudsmykket av herlegdom frå Den evige.
3 For Gud skal la alle under himmelen
få sjå din stråleglans.
4 Hos Gud skal du til evig tid
ha namnet «Rettferdig fred»
og «Gudfryktig herlegdom».
5 Stå opp, Jerusalem, og still deg på høgda!
Vend blikket mot aust og sjå borna dine
som samlast frå vest til aust
på bodet frå Den heilage,
og frydar seg over at Gud har hugsa på dei.
6 Dei forlét deg til fots, drivne av fiendar.
Men Gud fører dei attende til deg,
borne med ære, som på ei kongetrone.
7 For Gud har bode
at kvart høgt fjell og dei evige høgder skal senkast,
at dalar skal fyllast og bli flat mark,
så Israel trygt kan vandra i Guds herlegdom.
8 Også skogane og kvart velluktande tre
gjev Israel skugge etter påbod frå Gud.
9 For Gud skal leia det jublande Israel
i lyset frå sin herlegdom
med den miskunn og rettferd
som kjem frå han.